Parental Care Bill | ‘తల్లిదండ్రుల సంరక్షణ చట్టం’ బిల్లుకు తెలంగాణ అసెంబ్లీ ఆమోదం.. సీఎం రేవంత్​ రెడ్డి కీలక వ్యాఖ్యలు..

అక్షరటుడే, వెబ్​డెస్క్​: Parental Care Bill | తల్లిదండ్రుల సంరక్షణ చట్టం బిల్లుకు తెలంగాణ అసెంబ్లీ ఆమోద ముద్ర వేసింది. అసెంబ్లీ సమావేశాల్లో భాగంగా ఆదివారం ప్రభుత్వ ఉద్యోగుల జవాబుదారీతనం బిల్లుకు ఆమోదం తెలిపింది. తల్లిదండ్రులను పట్టించుకోని ఉద్యోగుల వేతనం నుంచి.. రూ.10 వేల వరకు కోత విధించి.. నేరుగా తల్లిదండ్రుల ఖాతాలో జమచేసేలా బిల్లును తెచ్చింది. అయితే ఈ చట్టం పరిధిలోకి ఉద్యోగులతో పాటు ప్రజాప్రతినిధులను కూడా తీసుకువస్తూ బిల్లుకు ఆమోదం తెలిపారు.

Parental Care Bill | తల్లిదండ్రుల పోషణ బాధ్యత

బిల్లుపై తెలంగాణ అసెంబ్లీలో చర్చ జరిగింది. ఈ సందర్భంగా ముఖ్యమంత్రి రేవంత్ రెడ్డి మాట్లాడారు. ప్రతిఒక్కరూ తల్లిదండ్రుల పోషణను సామాజిక బాధ్యతగా తీసుకోవాలనే ఉద్దేశంతో చట్టం తీసుకువచ్చామన్నారు. సామాజిక బాధ్యతగా మా ప్రభుత్వం బిల్లు తెచ్చిందన్నారు. పిల్లలను కనగలం కానీ.. వాళ్ల బుద్ధిని కనలేం అన్నట్టు కొందరి వ్యవహారం ఉందని వ్యాఖ్యానించారు. ప్రేమలు పంచాల్సిన చోట చట్టం తేవాల్సి రావడం బాధగా ఉందన్నారు. భక్తితో లేదా భయంతో అయినా తల్లిదండ్రులను చూసుకోవాలన్నదే మా ఆలోచన అని చెప్పారు. ఉద్యోగులే కాదు ప్రజాప్రతినిధులు కూడా ఈ చట్టంలోకి వస్తారని తెలిపారు. తల్లిదండ్రులను పట్టించుకోని ప్రతి కుమారుడికి బుద్ధి చెప్పాలనే ఈ చట్టం ఉద్దేశమన్నారు.

Parental Care Bill | పిల్లల కోసం శక్తిని దారబోసే తల్లిదండ్రులు

పిల్లల భవిష్యత్తు కోసం తల్లిదండ్రులు తమ శక్తినంతా ధారపోస్తారని ముఖ్యమంత్రి రేవంత్​ రెడ్డి అన్నారు. పిల్లల కోసం ఎంతో ఆరాట పడతారన్నారు. అలాంటి తల్లిదండ్రులను రెక్కలు వచ్చాక పట్టించుకోకపోవడం బాధాకరమన్నారు. ప్రతిఒక్కరూ తల్లిదండ్రులకు అండగా నిలవాలనే ఉద్దేశంతోనే చట్టం తీసుకొచ్చామని రేవంత్‌ చెప్పారు. అయితే సమాజంలో తల్లిదండ్రుల యోగక్షేమాలు చూడని వారిని సామాజికంగా బహిష్కరించాలని ప్రజలకు ముఖ్యమంత్రి పిలుపునిచ్చారు.

Parental Care Bill | 2007లో వృద్ధుల కోసం ప్రత్యేక చట్టం

వృద్ధుల కోసం కేంద్ర ప్రభుత్వం 2007లో ఒక ప్రత్యేక చట్టం తీసుకొచ్చిందని ముఖ్యమంత్రి గుర్తు చేశారు. ఈ చట్టం ప్రకారం తల్లిదండ్రులకు నెలకు రూ.10 వేలకు మించకుండా ఇవ్వాలని అందులో ఉందని పేర్కొన్నారు. అందుకే తాము తెచ్చిన నూతన చట్టంలో రూ.10 వేల నిబంధన పెట్టినట్లు ఆయన వివరించారు. ఇది ప్రభుత్వ ఉద్యోగులకే కాదు.. ప్రజా ప్రతినిధులకు కూడా వర్తిస్తుందని చెప్పారు.

ఇది కూడా చదవండి..: CM Revanth Reddy | కేసీఆర్​ అందుకే సభకు రావడం లేదు.. సీఎం సంచలన వ్యాఖ్యలు