అక్షరటుడే, వెబ్డెస్క్: PNG Connections India | పశ్చిమాసియాలో నెలన్నరగా జరుగుతున్న యుద్ధం కారణంగా వంటగ్యాస్ సరఫరాలో జాప్యం జరుగుతోంది. హార్మూజ్ జలసంధి (Strait of Hormuz) ద్వారా నౌకల రాకపోకలపై ఇరాన్ ఆంక్షలతో దేశంలో ఎల్పీజీ సరఫరాలో ఇబ్బందులు ఎదురవుతున్నాయి. దీనిని అధిగమించేందుకు కేంద్ర ప్రభుత్వం ప్రత్యామ్నాయాలపై దృష్టి సారించింది.
పశ్చిమాసియాలో యుద్ధం వంటగ్యాస్ ఎల్పీజీ సరఫరా (LPG supplies)లకు అంతరాయం కలిగిస్తుండడంతో ప్రభుత్వం పైప్డ్ నేచురల్ గ్యాస్( పీఎన్జీ) నెట్వర్క్ విస్తరణకు ప్రాధాన్యత ఇస్తోంది. ప్రధానంగా నగరాలలోని గృహాలు, వ్యాపారాల కోసం పీఎన్జీ ని ప్రోత్సహిస్తోంది. రీఫిల్స్ బుక్ చేసుకునే శ్రమ లేకుండా గ్యాస్ పైప్లైన్ ద్వారా నేరుగా ఇంటికే సరఫరా అవుతుంది కాబట్టి రోజువారీ వినియోగానికి ఎల్పీజీ సిలిండర్ల కంటే ఇది మరింత సౌకర్యవంతంగా ఉంటుందని భావిస్తున్నారు. దీంతో పీఎన్జీ కనెక్షన్లు (PNG Connections) పెరుగుతున్నాయి. గత నెలలో 3.1 లక్షలకు పైగా కనెక్షన్లకు గ్యాసిఫికేషన్ చేశారు. దీనికితోడు మరో 2.7 లక్షల కనెక్షన్లను జారీ చేశారు. మరోవైపు ఇదే సమయంలో 6వేల మంది పీఎన్జీ వినియోగదారులు ఎల్పీజీ కనెక్షన్లను వదులుకోవడం గమనార్హం.
PNG Connections India | గ్యాసిఫైడ్ కనెక్షన్లు అంటే..
భారతదేశం (India)లో ఫిబ్రవరి నెలాఖరు నాటికి 1.64 కోట్ల దేశీయ పీఎన్జీ కనెక్షన్లు, 48,568 వాణిజ్య, 21,512 పారిశ్రామిక కనెక్షన్లు ఉన్నాయి. మార్చిలో 3.1 లక్షల గ్యాసిఫైడ్ కనెక్షన్లు ఇచ్చారు. గ్యాసిఫైడ్ కనెక్షన్లు అంటే అంతకు ముందు నెలల్లో దరఖాస్తు చేసుకుని, మార్చిలో కనెక్ట్ చేయబడి, గ్యాస్ సరఫరా ప్రారంభమైనవి. అంతేకాకుండా ఈనెలలో 2.7 లక్షల కొత్త పీఎన్జీ కనెక్షన్ల కోసం దరఖాస్తులు వచ్చాయి. వాటికి గ్యాస్ సరఫరా ప్రారంభించే ప్రక్రియ కొనసాగుతోంది.
PNG Connections India | గ్యాస్ కొరత లేదంటున్న సర్కారు
గృహాలు, వాణిజ్య సంస్థలు, ఇతర సంస్థలకు పీఎన్జీ సరఫరాను వేగవంతం చేయడానికి ప్రభుత్వం ప్రాధాన్యత ఇస్తోందని, జాతీయ విస్తరణ కార్యక్రమాన్ని జూన్ నెలాఖరు వరకు పొడిగిస్తోందని కేంద్రం తెలిపింది. హాస్టళ్లు, కమ్యూనిటీ కిచెన్లు, విద్యా సంస్థలతో సహా అన్ని సంస్థలకు కనెక్షన్లను వేగవంతం చేయాలని నగర గ్యాస్ పంపిణీదారులను ఆదేశించింది. దేశంలో ఎల్పీజీ పంపిణీ స్థిరంగా కొనసాగుతోందని, డీలర్ల వద్ద ఎలాంటి కొరత ఉన్నట్లు నివేదికలు లేవని, మార్చిలో రోజువారీ సిలిండర్ డెలివరీలు సగటున 50 లక్షలకు పైగా ఉన్నాయని తెలిపింది.
ఇది కూడా చదవండి..: RBI MPC Meeting | అందరి చూపు ఆర్బీఐ వైపు!.. మూడు రోజుల ఎంపీసీ మీటింగ్ ప్రారంభం
