Illegal Quarry | అక్రమ క్వారీలు నిర్వహిస్తున్న ‘పొంగులేటి’ : హరీశ్​రావు

అక్షరటుడే, వెబ్​డెస్క్: Illegal Quarry | ఓఆర్‌ఆర్‌కు ఆనుకుని ఉన్న రాజేంద్రనగర్ మండలంలోని మానసహిల్స్ ప్రాంతంలో మంత్రి పొంగులేటి శ్రీనివాస్​రెడ్డి (Ponguleti Srinivas Reddy)కి చెందిన సంస్థ రాఘవ కన్‌స్ట్రక్షన్స్ అక్రమ క్వారీలు నిర్వహిస్తోందని మాజీ మంత్రి హరీశ్​రావు (Harish Rao) ఆరోపించారు. అనుమతులు లేకుండా కొండలను పిండి చేసి కోట్లు దండుకుంటుంటే ప్రభుత్వం ఎందుకు మౌనంగా ఉందని ప్రశ్నించారు.

రాత్రి పగలు తేడా లేకుండా భారీ యంత్రాలతో బండరాళ్లను తొలుస్తూ, అక్రమంగా తరలిస్తూ వ్యాపారం చేస్తున్నారని హరీశ్​రావు ఆరోపించారు. అయినా సంబంధిత అధికారులు చర్యలు చేపట్టడం లేదన్నారు. మంత్రి కుటుంబం చేసే అక్రమ దందాలో ఎవరికి వాటాలు వెళ్తున్నాయని ఆయన ప్రశ్నించారు. క్వారీకి ఎలాంటి అనుమతులు లేకున్నా మంత్రి కుటుంబం అయితే సరిపోతుందా అని ప్రశ్నించారు.

Illegal Quarry | అనుమతులు లేకుండానే..

సదరు క్వారీకి పీసీబీ, పర్యావరణ అనుమతులు లేవన్నారు. మైనింగ్/క్వారీయింగ్ లీజ్, మైన్స్ & జియాలజీ విభాగం, స్థానిక గ్రామపంచాయతీ/మున్సిపల్ అనుమతి లేవన్నారు. ల్యాండ్ యూజ్ మార్పిడి క్లియరెన్స్ లేదని పేర్కొన్నారు. ఏ అనుమతులు లేకుండానే యథేచ్ఛగా క్వారీ నిర్వహిస్తున్నారని ఆయన ఆగ్రహం వ్యక్తం చేశారు.

Illegal Quarry | రియల్​ ఎస్టేట్​ కోసం..

ముఖ్యమంత్రి రేవంత్ రెడ్డి (CM Revanth Reddy) రియల్ ఎస్టేట్ దందా కోసం పేదల ఇండ్లు కూల్చుతారని, మరోవైపు తన అల్లుడి అనుయాయుల క్వారీ కోసం ఎలాంటి బిడ్డింగ్ లేకుండా గంపగుత్తగా 17 ఎకరాల ప్రభుత్వ భూమి కట్టాబెట్టారన్నారు. ఇంకోవైపు మంత్రి పొంగులేటి అక్రమ క్వారీతో ఏకంగా కొండలనే ఖతం చేస్తున్నారని సంచలన వ్యాఖ్యలు చేశారు. అసలు రాష్ట్రంలో ఉన్నది ప్రభుత్వమా? లేక రియల్ ఎస్టేట్ (Real Estate) కంపెనీనా అని హరీశ్​రావు ప్రశ్నించారు. ప్రభుత్వ భూములు రక్షించాల్సిన ముఖ్యమంత్రి, మంత్రులే భూ బకాసురులుగా మారి భూములను భక్షిస్తున్నారన్నారు.

Illegal Quarry | హైడ్రా ఎక్కడ..

ప్రభుత్వ ఆస్తిని మంత్రి కంపెనీ అప్పనంగా తన్నుకు పోతుంటే హైడ్రా (Hydraa) ఎక్కడికి వెళ్లిందని మాజీ మంత్రి ప్రశ్నించారు. శని, ఆదివారాలు వచ్చిందంటే చాలు పేదల ఇళ్ల మీదకు వెళ్ళే హైడ్రా బుల్డోజర్​కు ప్రభుత్వ భూమిలో ఉన్న ఈ అక్రమ క్వారీ కనిపించడం లేదా అన్నారు. సాధారణ ప్రజలకు ఒక న్యాయం? ముఖ్యమంత్రి అల్లుడి అనుయాయులు, మంత్రులకు ఒక న్యాయమా అని నిలదీశారు. అక్రమంగా క్వారీ నిర్వహిస్తున్న రాఘవ కన్​స్ట్రక్షన్​ కంపెనీ (Raghava Construction Company)పై వెంటనే చర్యలు తీసుకోవాలని డిమాండ్​ చేశారు.

ఇది కూడా చదవండి..: Telangana Control Room | పశ్చిమాసియాలో ఉద్రిక్తతలు.. కంట్రోల్​ రూం ఏర్పాటు చేసిన ప్రభుత్వం