అక్షరటుడే, వెబ్డెస్క్: RBI Repo Rate | దేశీయ ఆర్థిక వ్యవస్థను సమతుల్యంగా ఉంచడం కోసం ఆర్బీఐ చర్యలు తీసుకుంటుంటుంది. ద్రవ్యోల్బణం నియంత్రణ, ఆర్థిక వృద్ధికి ప్రోత్సాహం అందించడం, ద్రవ్య ప్రవాహాన్ని నియంత్రించడం లక్ష్యాలుగా వడ్డీ రేట్లను పెంచడం కానీ, తగ్గించడం కానీ చేస్తుంది. ఇందుకోసం ప్రతి రెండు నెలలకోసారి ఆర్బీఐ మానిటరీ పాలసీ కమిటీ మీటింగ్ (Committee Meeting) నిర్వహిస్తారు.
మూడు రోజులపాటు చర్చించి నిర్ణయం తీసుకుంటారు. ధరలు వేగంగా పెరగడం వల్ల ద్రవ్యోల్బణం ఎక్కువయ్యే ప్రమాదం ఉంటుంది. ఈ నేపథ్యంలో ద్రవ్యోల్బణాన్ని అదుపు చేయడం కోసం కేంద్ర బ్యాంక్ రెపో రేట్ను పెంచుతుంది. అంతర్జాతీయ అనిశ్చిత పరిస్థితులతో ఆర్థిక మాంద్యం పెరిగే ప్రమాదం ఉండడంతో ఆర్బీఐ 2004 డిసెంబర్ వరకు విడతల వారీగా రెపో రేటును పెంచుతూ వెళ్లింది. ఆ ఏడాది డిసెంబర్లో వడ్డీ రేట్లు 6.50 శాతం వద్ద గరిష్టాన్ని తాకాయి.
RBI Repo Rate | రెపో రేటు పెంచితే ఏం జరుగుతుందంటే..
ఆర్బీఐ రెపో రేటును పెంచితే పలు మార్పులు చోటు చేసుకుంటాయి. బ్యాంకులు ఆర్బీఐ నుంచి ఎక్కువ వడ్డీకి డబ్బు తీసుకోవాల్సి వస్తుంది. అలాగే వినియోగదారులపైనా భారం పడుతుంది. బ్యాంకులనుంచి తీసుకున్న Home loan, కార్ లోన్ తదితరాలపై అధిక వడ్డీ చెల్లించాల్సి వస్తుంది. ఫలితంగా ప్రజలు అప్పులు తీసుకోవడం తగ్గిస్తారు. ఖర్చు చేసే స్థోమత తగ్గడం వల్ల డిమాండ్ తగ్గుతుంది. దీని వల్ల ధరలు స్థిరపడడం కానీ, తగ్గడం కానీ జరుగుతుంది. అధిక ద్రవ్య ప్రవాహాన్ని నియంత్రించడానికి రెపో రేటు పెంచడం దోహదపడుతుంది. 2022 నుంచి 2024 మధ్య కాలంలో వడ్డీ రేట్లు 4 శాతంనుంచి 6.5 శాతానికి పెరిగాయి.
RBI Repo Rate | వడ్డీ రేట్లు తగ్గిస్తే..
ఆర్థికవృద్ధి మందగిస్తున్నట్లు గానీ, ద్రవ్యోల్బణం అదుపులో ఉన్నట్లుగానీ ఆర్బీఐ (RBI) భావిస్తే రెపో రేట్లను తగ్గించడానికి చర్యలు తీసుకుంటుంది. వడ్డీ రేట్లను తగ్గించడం వల్ల బ్యాంకులు ఆర్బీఐ నుంచి తక్కువ వడ్డీకే రుణాలు తీసుకునే వెసులుబాటు లభిస్తుంది. తద్వారా వినియోగదారులకు తక్కువ వడ్డీకే రుణాలు పొందడానికి అవకాశం ఉంటుంది. దీంతో మార్కెట్లో లిక్విడిటీ పెరిగి కొనుగోలు శక్తి పెరిగి ఆర్థికాభివృద్ధి జరుగుతుంది.
RBI Repo Rate | ఏడాదిన్నరలో 125 బేసిస్ పాయింట్ల తగ్గింపు..
రిజర్వ్ బ్యాంక్ ఆఫ్ ఇండియా (Reserve Bank of India) రెపో రేటును గరిష్టాలనుంచి ఏడాదిన్నర కాలంలో 125 బేసిస్ పాయింట్ల మేర తగ్గించింది. ఇది ఆర్థిక వృద్ధిని ప్రోత్సహించడం కోసం చేసిన రేట్ కట్.
2024 డిసెంబర్లో రెపో రేటు 6.50 శాతంగా ఉంది. 2025 ఫిబ్రవరిలో ఆర్బీఐ 25 బేసిస్ పాయింట్ల మేర తగ్గించడంతో రెపో రేటు 6.25 శాతానికి తగ్గింది.
ఏప్రిల్లో 25 పాయింట్లు, జూన్లో 50 పాయింట్లు తగ్గించడంతో రెపో రేటు 5.50 శాతంగా ఉంది.
ఆగస్టు, అక్టోబర్లలో వడ్డీ రేట్లలో ఎలాంటి మార్పు లేదు.
డిసెంబర్లో 25 పాయింట్లు తగ్గించడంతో రెపోరేటు 5.25 శాతానికి తగ్గింది.
ఈ ఏడాది ఫిబ్రవరిలో వడ్డీ రేట్లను తగ్గించలేదు.
RBI Repo Rate | ఈసారీ యథాతథంగా..
ఆర్బీఐ మానిటరీ పాలసీ కమిటీ మీటింగ్ ఈనెల 6 నుంచి 8వ తేదీ వరకు నిర్వహించారు. ప్రస్తుత అనిశ్చిత పరిస్థితులలో వడ్డీ రేట్లను యథాతథంగా ఉంచాలని ఈ సమావేశంలో నిర్ణయించారు. దీంతో రెపో రేటు 5.25 వద్ద కొనసాగనుంది. పశ్చిమాసియాలో యుద్ధం కారణంగా క్రూడ్ ఆయిల్ (Crude Oil) ధర భారీగా పెరగడం, రూపాయి విలువ గణనీయంగా క్షీణించడం, ద్రవ్యోల్బణం పెరుగుతుండడంతో ఆర్బీఐ ఈ నిర్ణయం తీసుకుంది.
ఇది కూడా చదవండి..: Toll Rules Change | ఏప్రిల్ 10 నుంచి టోల్ చెల్లింపుల్లో భారీ మార్పులు.. నగదు రద్దు, కొత్త విధానం అమలు
