అక్షరటుడే, వెబ్డెస్క్: Reels Stunt Death | సోషల్ మీడియా (Social Media) రీల్స్ కోసం యువత ప్రమాదకర స్టంట్లు చేయడం రోజురోజుకు పెరుగుతోంది. వ్యూస్, లైక్స్ కోసం ప్రాణాలను సైతం పణంగా పెడుతున్న ఘటనలు తరచూ వెలుగులోకి వస్తున్నాయి. తాజాగా ఢిల్లీలో జరిగిన ఓ విషాద ఘటన రీల్స్ పిచ్చి ఎంత ప్రమాదకరమో మరోసారి చూపించింది.
తూర్పు ఢిల్లీకి (East Delhi) చెందిన పవన్ అనే యువకుడు సోషల్ మీడియా కోసం రీల్ చేయబోతూ ప్రమాదానికి గురయ్యాడు. సమాచారం ప్రకారం.. పవన్ తన స్నేహితుడితో కలిసి ఒక వీడియో షూట్ చేస్తుండగా ఈ ఘటన జరిగింది. పవన్ తుపాకీతో స్టంట్ చేస్తూ వీడియో తీయాలని నిర్ణయించుకున్నాడు. ఆ సమయంలో అతని స్నేహితుడు మొబైల్ ఫోన్లో వీడియో రికార్డ్ చేస్తున్నట్లు తెలుస్తోంది.
Reels Stunt Death | చేజేతులారా..
వీడియోలో పవన్ చేతిలో లోడ్ చేసిన తుపాకీ కనిపిస్తోంది. గన్ బటన్ ఎలా నొక్కాలో అతని స్నేహితుడు చెబుతుండగా పవన్ తుపాకీని లోడ్ చేసి ఛాతీ వైపు గురిపెట్టాడు. కెమెరా వైపు చూస్తూ నవ్వుతూ స్టంట్ చేయబోతున్నట్లు వీడియోలో కనిపించింది. అయితే వీడియో రికార్డ్ చేస్తున్న వ్యక్తి “కాల్చొద్దు అన్నా..” అని హెచ్చరించినప్పటికీ పవన్ గందరగోళంలో తుపాకీ ట్రిగ్గర్ను నొక్కేశాడు. వెంటనే బుల్లెట్ అతని గుండెల్లోకి దూసుకెళ్లింది. దీంతో పవన్ అక్కడికక్కడే కుప్పకూలిపోయాడు. స్నేహితులు వెంటనే స్పందించి పవన్ను సమీప ఆసుపత్రికి తరలించారు. కానీ అప్పటికే అతను తీవ్రంగా గాయపడడంతో చికిత్స పొందుతూ మృతి చెందినట్లు వైద్యులు తెలిపారు.
Reels Stunt Death | దర్యాప్తు చేపట్టిన పోలీసులు
ఈ ఘటనపై సమాచారం అందుకున్న పోలీసులు వెంటనే కేసు నమోదు చేసి దర్యాప్తు ప్రారంభించారు. పవన్ వాడిన తుపాకీ అతని స్నేహితుడిదేనని, దానికి లైసెన్స్ ఉన్నట్లు పోలీసులు గుర్తించారు. అయితే తుపాకీ ఎలా లోడ్ అయింది. ప్రమాదం ఎలా జరిగింది అనే విషయాలపై అధికారులు విచారణ కొనసాగిస్తున్నారు. ఈ ఘటన సోషల్ మీడియాలో వైరల్ కావడంతో నెటిజన్లు తీవ్రంగా స్పందిస్తున్నారు. వ్యూస్, లైక్స్ కోసం ప్రాణాలను పణంగా పెట్టే స్టంట్లు చేయొద్దని, సోషల్ మీడియా కోసం ఇలాంటి ప్రమాదకర చర్యలు చేయడం వల్ల కుటుంబాలు నష్టపోతాయని పలువురు హెచ్చరిస్తున్నారు.
ఇది కూడా చదవండి..: India UAE Talks | యూఏఈ ప్రెసిడెంట్కు మోడీ ఫోన్.. ఏమేమి మాట్లాడుకున్నారంటే..!
