అక్షరటుడే, వెబ్డెస్క్: Revive Plants Tips | మన ఇంట్లో ఎంతో ఇష్టంగా, అపురూపంగా పెంచుకునే పచ్చని మొక్కలు.. ఒక్కోసారి మన అశ్రద్ధ వల్లనో లేదా ఎండల తీవ్రత వల్లనో కళ్లముందే వాడిపోతుంటే మనసు విలవిల్లాడుతుంది. ‘అయ్యో.. ఈ మొక్క చనిపోతుందేమో’ అని ఆందోళన పడుతున్నారా..? అయితే వాడిపోయిన పచ్చని మొక్కలకు తిరిగి ప్రాణం పోసే అద్భుతమైన ‘సంజీవని’ లాంటి చిట్కాలు మన ఇంట్లోనే ఉన్నాయి. అవేంటో తెలిస్తే ఆశ్చర్యపోతారు.
Revive Plants Tips | బియ్యం కడిగిన నీటి మ్యాజిక్:
సాధారణంగా మనం బియ్యం కడిగిన నీటిని పారబోస్తుంటాం. కానీ, ఈ నీరు వాడిపోయిన మొక్కలకు టానిక్ లా పనిచేస్తుంది. ఈ నీటిని ఒక స్ప్రే బాటిల్లో పోసి, ప్రతిరోజు మొక్క మొదళ్లలో చల్లితే అవి త్వరగా కోలుకుంటాయి. ఇందులో ఉండే పోషకాలు మొక్కలకు కొత్త శక్తిని ఇస్తాయి.
Revive Plants Tips | అరటి తొక్కలతో పొటాషియం పవర్:
అరటి తొక్కలను పారేయకుండా చిన్న ముక్కలుగా కోసి, ఒక లీటరు నీటిలో రాత్రంతా నానబెట్టండి. మరుసటి రోజు ఆ నీటిని వడకట్టి మొక్కలపై స్ప్రే చేయండి. అరటి తొక్కల్లో ఉండే పొటాషియం, మొక్కలు తిరిగి జీవం పోసుకోవడానికి, బలంగా పెరగడానికి ఎంతగానో తోడ్పడుతుంది.
ఎండిన ఆకులను తొలగించడం:
మొక్కపై ఉన్న వాడిపోయిన ఆకులు లేదా పువ్వులను ఎప్పటికప్పుడు తుంచి వేయాలి. దీనివల్ల మొక్కలోని శక్తి వృథా కాకుండా, కొత్తగా వచ్చే ఆకులకు, కొమ్మలకు అందుతుంది. ఇది మొక్క మళ్లీ చిగురించడానికి సహాయపడుతుంది.
సూర్యరశ్మి, గాలి:
ఎండ సరిగ్గా తగలకపోయినా మొక్కలు పాలిపోయినట్లు అవుతాయి. అందుకే మొక్కలను తగినంత ఎండ, గాలి తగిలే ప్రదేశంలో ఉంచాలి. ముఖ్యంగా నీడలో ఉండే మొక్కలకు కూడా రోజులో కొంత సమయం లేత ఎండ తగిలేలా చూడటం మంచిది.
కుండీ మార్చడం (Repotting):
కొన్నిసార్లు మొక్క పెరిగే కొద్దీ వేర్లు ఎక్కువగా విస్తరిస్తాయి. కుండీ చిన్నదైతే వేర్లకు సరిగ్గా పోషణ అందక మొక్క వాడిపోతుంది. అలాంటప్పుడు పాత కుండీ నుంచి మొక్కను తీసి, కాస్త పెద్ద కుండీలో కొత్త మట్టి, సహజ ఎరువులు వేసి నాటడం వల్ల మొక్క ఆరోగ్యంగా పెరుగుతుంది.
సహజ ఎరువులు, రక్షణ:
కెమికల్స్ జోలికి వెళ్లకుండా ఇంట్లోనే దొరికే సహజ సిద్ధమైన ఎరువులను వాడాలి. అలాగే మొక్కలకు చీడపీడలు పట్టకుండా వేపనూనె వంటివి స్ప్రే చేస్తూ జాగ్రత్తగా చూసుకోవాలి.
ఇది కూడా చదవండి : Rajma Health Benefits | మాంసాహారానికి ప్రత్యామ్నాయం.. ప్రొటీన్కు రారాజు రాజ్మా
