అక్షరటుడే, వెబ్డెస్క్ : Russia Plane Crash | రష్యా (Russia)కు చెందిన సైనిక రవాణా విమానం Antonov An-26 ఘోర ప్రమాదానికి గురైంది. క్రిమియా ప్రాంతంలో ఈ విమానం కొండను ఢీకొని కుప్పకూలడంతో విమానంలో ఉన్న మొత్తం 29 మంది మృతి చెందారు. మృతుల్లో 23 మంది ప్రయాణికులు, 6 మంది సిబ్బంది ఉన్నట్లు రష్యా రక్షణ శాఖ అధికారులు తెలిపారు.
స్థానిక కాలమానం ప్రకారం మంగళవారం సాయంత్రం సుమారు 6 గంటల సమయంలో విమానం అకస్మాత్తుగా సిగ్నల్స్ కోల్పోయింది. అనంతరం క్రిమియాలోని పర్వత ప్రాంతాన్ని ఢీకొని కూలిపోయినట్లు అధికారులు వెల్లడించారు. ప్రమాదం జరిగిన వెంటనే రక్షణ సిబ్బంది ఘటనాస్థలికి చేరుకున్నప్పటికీ, అప్పటికే అందరూ మృతి చెందినట్లు నిర్ధారించారు.
Russia Plane Crash | దాడి కాదు.. సాంకేతిక లోపమే
ఈ ప్రమాదంపై స్పష్టత ఇస్తూ రష్యా రక్షణ శాఖ (Russian Ministry of Defense), విమానంపై ఎలాంటి దాడి జరిగిన ఆనవాళ్లు లేవని తెలిపింది. సాంకేతిక లోపం కారణంగానే ఈ ప్రమాదం చోటుచేసుకున్నట్లు ప్రాథమికంగా నిర్ధారించామని పేర్కొంది. పూర్తి స్థాయి విచారణ కొనసాగుతోందని అధికారులు తెలిపారు. Antonov An-26 విమానాలు 1969 నుంచి సేవలందిస్తున్నాయి. అయితే గత కొన్నేళ్లుగా ఈ మోడల్కు చెందిన విమానాలు వరుస ప్రమాదాలకు గురవుతుండటం ఆందోళన కలిగిస్తోంది.
Russia Plane Crash | గత ప్రమాదాలు కూడా ఇదే మోడల్తో
2022: ఉక్రెయిన్లోని జపోరిజ్జియా ప్రాంతంలో ఏఎన్-26 కుప్పకూలి ఒకరు మృతి
2020: ఈశాన్య ఉక్రెయిన్లో శిక్షణా విమానం కూలి 27 మందిలో 26 మంది మృతి
2020: దక్షిణ సూడాన్లో జరిగిన ప్రమాదంలో 8 మంది మృతి
2017: కోట్ డి ఐవరీలో ల్యాండింగ్ సమయంలో ప్రమాదంలో నలుగురు మృతి చెందారు.
ఈ వరుస ఘటనలు పాత విమానాల భద్రతపై ప్రశ్నలు లేవనెత్తుతున్నాయి.
క్రిమియా (Crimea)లో జరిగిన ఈ తాజా ప్రమాదం మరోసారి విమాన భద్రతపై చర్చకు దారితీసింది. సాంకేతిక లోపాలపై సమగ్ర విచారణ జరిపి, భవిష్యత్తులో ఇలాంటి ఘటనలు జరగకుండా చర్యలు తీసుకోవాల్సిన అవసరం ఉందని నిపుణులు సూచిస్తున్నారు.
ఇది కూడా చదవండి..: Iran warning employees | మధ్యప్రాచ్యంలో ఉద్రిక్తతలు మరింత ముదురుతున్నాయా.. అమెరికన్ కంపెనీల ఉద్యోగులకు ఇరాన్ హెచ్చరిక!
