అక్షరటుడే, వెబ్డెస్క్ : Sajjanar Warning | నగరంలో హోలీ పండుగ (Holi Festival)ను ప్రశాంతంగా జరుపుకోవాలని హైదరాబాద్ సీపీ సజ్జనార్ (CP Sajjanar) పోలీసులకు సూచించారు. ఇతరులకు ఇబ్బంది కలిగించేలా ప్రవర్తిస్తే కఠిన చర్యలు తప్పవని హెచ్చరించారు.
బంజారాహిల్స్లోని కమాండ్ కంట్రోల్ సెంటర్ (TGICCC) నుంచి సోమవారం సీపీ పోలీసు అధికారులతో వీడియో కాన్ఫరెన్స్ ద్వారా సమీక్ష నిర్వహించారు. పండుగ పూట అవాంఛనీయ ఘటనలు జరగకుండా చర్యలు చేపట్టాలని ఆదేశించారు. బ్లూ కోట్స్, పెట్రోలింగ్ సిబ్బంది గస్తీ కాయాలన్నారు. ఇష్టం లేని వారిపై బలవంతంగా రంగులు పూస్తే ఊరుకునేది లేదని హెచ్చరించారు.
Sajjanar Warning | షీ టీమ్స్ నిఘా
బహిరంగ ప్రదేశాల్లో, పాదచారులు, వాహనాలపై రంగులు చల్లొద్దని, మహిళల పట్ల అసభ్యంగా ప్రవర్తించే ఆకతాయిల ఆటకట్టించేందుకు నగరవ్యాప్తంగా మఫ్టీలో షీ టీమ్స్ నిఘా ఉంటుందన్నారు. ప్రజలు రసాయన రంగులకు బదులు సహజసిద్ధమైనవి వాడాలని సీపీ సూచించారు. హోలీ వేడుకల్లో డీజేలకు అనుమతి లేదన్నారు. రోడ్లపై గుంపులుగా తిరుగుతూ న్యూసెన్స్ చేస్తే వాహనాలు సీజ్ చేస్తామన్నారు.
Sajjanar Warning | మద్యం దుకాణాల బంద్
హోలీ సందర్భంగా కమిషనరేట్ పరిధిలో మంగళవారం ఉదయం 6 గంటల నుంచి సాయంత్రం 6 గంటల వరకు మద్యం దుకాణాలు, కల్లు కాంపౌండ్లు, బార్ అండ్ రెస్టారెంట్లపై ఆంక్షలు విధించినట్లు తెలిపారు. నిబంధనలు ఉల్లంఘించి మద్యం విక్రయాలు జరిపితే కేసులు నమోదు చేస్తామన్నారు. ఈ సమావేశంలో అదనపు సీపీ తఫ్సీర్ ఇక్బాల్, జాయింట్ సీపీలు శ్వేత, ఎస్ఎం విజయ్ కుమార్, డీసీపీలు ఖారే కిరణ్ ప్రభాకర్, రూపేశ్, వెంకట లక్ష్మి, తదితరులు పాల్గొన్నారు.
దీనిని కూడా చదవండి : Hyderabad Traffic Relief | ట్రాఫిక్ రద్దీ నివారణకు చర్యలు : సీపీ సజ్జనార్
