అక్షరటుడే, మెదక్ : Singur Dam Safety | సింగూరు డ్యామ్ సేఫ్టి పనులను యుద్ధ ప్రాతిపదికన పూర్తి చేయాలని మంత్రులు ఆదేశించారు. పెద్దారెడ్డి లిఫ్ట్ ఇరిగేషన్ స్కీం పనుల DPR రూపొందించాలన్నారు. ఉగాదిలోగా పెద్దారెడ్డి లిఫ్ట్ ఇరిగేషన్ స్కీం పనులకు శంకుస్థాపన చేయాలని సూచించారు. సింగూర్ ప్రాజెక్టు కాలువల లైనింగ్ పనులను జూన్ 26 లోగా పూర్తిచేయాలని ఆదేశించారు.
రాష్ట్ర సచివాలయంలో భారీ నీటిపారుదల శాఖ మంత్రి ఉత్తంకుమార్ రెడ్డి (Uttam Kumar Reddy) అధ్యక్షతన సింగూరు ప్రాజెక్టు డ్యాం సేఫ్టీపై రాష్ట్ర వైద్య, ఆరోగ్య శాఖ మంత్రి దామోదర్ రాజనర్సింహ, ఉమ్మడి మెదక్ జిల్లా ఇన్ఛార్జి మంత్రి వివేక్ వెంకటస్వామి, ఇరిగేషన్ శాఖ అధికారులతో సమీక్షించారు. మంత్రులు మాట్లాడుతూ.. సింగూరు ప్రాజెక్ట్ భద్రత ప్రభుత్వానికి ఎంతో ప్రాధాన్యత అంశం అన్నారు. నేషనల్ డ్యామ్ సెక్యూరిటీ సంస్థ రూపొందించిన నిబంధనల మేరకు డ్యాంను పరిరక్షించాలని ఆదేశించారు.
Singur Dam Safety | డ్యామ్ సేఫ్టీపై ఆందోళన
సింగూరు డ్యామ్ సేఫ్టీపై ఆందోళన నెలకొని ఉన్న విషయం తెలిసిందే. గతంలో ఎన్డీఎస్ఏ (NDSA) అధికారులు ప్రాజెక్ట్ భద్రతపై అనుమానాలు వ్యక్తం చేశారు. పూర్తిస్థాయిలో నింపొద్దని ఆదేశించారు. దీంతో అధికారులు వర్షాకాలంలో పూర్తిగా నింపకుండా నీటిని వదిలేశారు. యాసంగి సీజన్లో ప్రతి ఏడాది సింగూరు నుంచి ఘనపురం ఆనకట్ట (Ghanpur Anakatta)కు నీటిని వదులుతారు. దీని ద్వారా మెదక్, పాపన్నపేట, కొల్చారం, హవేలి ఘన్పూర్ (Haveli Ghanpur) మండలాల్లో వేల ఎకరాల పంటలు సాగు అవుతాయి. ప్రస్తుతం మరమ్మతు పనుల కోసం డ్యామ్ను ఖాళీ చేశారు. దీంతో కాలువల ద్వారా నీటి విడుదల సైతం చేపట్టలేదు. ఈ క్రమంలో పనులు వేగంగా పూర్తి చేసి వానాకాలం సీజన్లో సాగు నీరు అందించాలని మంత్రులు సూచించారు.
Singur Dam Safety | పెద్దారెడ్డి లిఫ్ట్పై..
ఆందోల్ నియోజకవర్గంలో 40 వేల ఎకరాలకు సాగునీరు అందించే పెద్దారెడ్డి లిఫ్ట్ ఇరిగేషన్ స్కీం DPRలను రూపొందించి ప్రభుత్వానికి అందజేయాలని మంత్రులు ఆదేశించారు. ఉగాదిలోగా శంకుస్థాపన పనులకు శ్రీకారం చుట్టాలన్నారు. సింగూరు కాలువల లైనింగ్ పనులను జూన్ 26లోగా పూర్తి చేయాలని పేర్కొన్నారు.
