అక్షరటుడే, వెబ్డెస్క్: Small Notes ATM | రోజువారీ లావాదేవీల్లో చిన్న నోట్ల అవసరం ఎక్కువగా ఉండటంతో ప్రజలు తరచూ ఇబ్బందులు ఎదుర్కొంటున్నారు. ప్రస్తుతం చాలా ఏటీఎంలలో నగదు విత్డ్రా చేస్తే రూ.100, రూ.200, రూ.500 వంటి పెద్ద కరెన్సీ నోట్లు (Currency Notes) మాత్రమే అందుబాటులో ఉంటాయి.
రూ.10, రూ.20, రూ.50 వంటి చిన్న నోట్లను ఏటీఎంల నుంచి పొందే అవకాశం లేకపోవడంతో చిన్న లావాదేవీల సమయంలో సమస్యలు తలెత్తుతున్నాయి. ఈ నేపథ్యంలో చిన్ననోట్ల కొరతపై వస్తున్న ఫిర్యాదులను పరిగణలోకి తీసుకున్న కేంద్ర ప్రభుత్వం (Central Government) కీలక నిర్ణయం తీసుకుంది. ఇకపై ఏటీఎంల ద్వారా చిన్న కరెన్సీ నోట్లను కూడా అందుబాటులోకి తీసుకురావడానికి చర్యలు ప్రారంభించింది.
Small Notes ATM | ఇక చింత అక్కర్లేదు..
ఇటీవల చిన్న నోట్ల చలామణి తగ్గిందనే ప్రచారం దేశవ్యాప్తంగా జోరుగా సాగుతోంది. ఈ విషయంపై పార్లమెంటులో కూడా చర్చ జరిగింది. ప్రతిపక్ష సభ్యులు అడిగిన ప్రశ్నలకు సమాధానంగా కేంద్ర ఆర్థిక శాఖ సహాయ మంత్రి పంకజ్ చౌదరి (Pankaj Chowdary) స్పందించారు. రాజ్యసభలో మాట్లాడుతూ దేశంలో చిన్న కరెన్సీ నోట్ల కొరత లేదని ఆయన స్పష్టం చేశారు. ప్రస్తుతం ఉన్న సంప్రదాయ ఏటీఎంలు చిన్న నోట్లను పంపిణీ చేసే విధంగా రూపొందించబడలేదని, అందువల్లే ప్రజలకు ఆ అవకాశం లేకపోతుందని వివరించారు. అయితే ఈ సమస్యను పరిష్కరించేందుకు ప్రభుత్వం కొత్త విధానాన్ని పరీక్షిస్తోంది. పైలట్ ప్రాజెక్ట్ కింద ‘స్మాల్ డినామినేషన్ డిస్పెన్సర్’ మెషీన్లను పరీక్షిస్తున్నట్లు మంత్రి తెలిపారు. ఈ ప్రత్యేక మెషీన్ల ద్వారా రూ.10, రూ.20, రూ.50 వంటి చిన్న కరెన్సీ నోట్లను నేరుగా ఏటీఎంల నుంచి డ్రా చేసుకునే అవకాశం ఉంటుందని చెప్పారు.
Small Notes ATM | చిన్న నోట్లు చలామణిలో
ఈ వ్యవస్థ పూర్తిస్థాయిలో అమల్లోకి వస్తే చిన్న లావాదేవీల సమయంలో ప్రజలు ఎదుర్కొంటున్న సమస్యలు తగ్గే అవకాశం ఉంది. ముఖ్యంగా ఆటో ఛార్జీలు, బస్సు టిక్కెట్లు, చిన్న కొనుగోళ్ల సమయంలో పెద్ద నోట్ల మార్పిడి సమస్యకు పరిష్కారం లభించే అవకాశముంది. ఇక కేంద్ర ప్రభుత్వం వెల్లడించిన వివరాల ప్రకారం ప్రస్తుత ఆర్థిక సంవత్సరం ఫిబ్రవరి 26 వరకు దేశంలో భారీ మొత్తంలో చిన్న నోట్లు చలామణిలో ఉన్నాయి. అందులో రూ.10 నోట్లు రూ.439.4 కోట్ల విలువతో, రూ.20 నోట్లు రూ.193.7 కోట్ల విలువతో, రూ.50 నోట్లు రూ.130.3 కోట్ల విలువతో చలామణిలో ఉన్నట్లు వెల్లడించారు. అలాగే గత ఆర్థిక సంవత్సరంలో భారతీయ రిజర్వ్ బ్యాంక్ (Reserve Bank of India) భారీగా చిన్న కరెన్సీ నోట్లను సరఫరా చేసింది. అందులో రూ.10 నోట్లు రూ.150 కోట్ల విలువకు, రూ.20 నోట్లు రూ.150 కోట్ల విలువకు, రూ.50 నోట్లు రూ.300 కోట్ల విలువకు విడుదల చేసినట్లు కేంద్రం తెలిపింది.
Small Notes ATM | కొత్త విధానం అమల్లోకి
కేంద్ర ప్రభుత్వం చేపడుతున్న ఈ కొత్త విధానం అమల్లోకి వస్తే భవిష్యత్తులో ఏటీఎంల నుంచి చిన్న నోట్లను కూడా సులభంగా పొందే అవకాశం కలుగనుంది. దీంతో సాధారణ ప్రజల రోజువారీ లావాదేవీలు మరింత సులభతరం కానున్నాయి.
ఇది కూడా చదవండి..: LPG Supply Update | గ్యాస్ కొరత లేదు.. 10 శాతం ఉత్పత్తి పెరిగింది..: కేంద్ర ప్రభుత్వ వర్గాలు
