South Central Railway Offer | ఒకే టికెట్‌తో వేర్వేరు తీర్థయాత్రలు.. సౌత్ సెంట్రల్ రైల్వే సూపర్ ఆఫర్

అక్షరటుడే, వెబ్​డెస్క్ : South Central Railway Offer | ఆధ్యాత్మిక క్షేత్రాలను చుట్టిరావాలని భక్తులందరికీ ఉంటుంది. అయితే దీనికి బోలెడు డబ్బు అవసరం అవుతుంది. దీంతో డబ్బులు లేక చాలామంది తీర్థయాత్రలకు వెనకడుగు వేస్తుంటారు. ఇంకొందరు డబ్బులు కూడబెట్టేంతవరకు వాయిదాలతో కాలం గడువుతుంటారు.

అలాంటి వారి తీర్థయాత్ర అభిలాషను తీర్చడం కోసం సౌత్ సెంట్రల్ రైల్వే (South Central Railway) సరికొత్త సర్క్యులేటింగ్ జర్నీ టికెట్ ను తీసుకువచ్చింది. తక్కువ ఖర్చుతో పలు తీర్థయాత్రలు చేసే అవకాశాన్ని కల్పించడం దీని ఉద్దేశం. ఒకే టికెట్‌తో వేర్వేరు తీర్థయాత్రలు దీని ప్రత్యేకత. హైదరాబాద్ (Hyderabad) నుంచి ప్రముఖ ఆధ్యాత్మిక ప్రదేశాలకు వెళ్లాలనుకునే వారికి ఇది శుభవార్తనే చెప్పవచ్చు. సాధారణ ప్రయాణ చార్జీలతో పోల్చితే 25 శాతం తక్కువకే ఈ టికెట్ లభిస్తుంది. ప్రస్తుతం నాంపల్లి, కాచిగూడ, సికింద్రాబాద్ స్టేషన్ల (Secunderabad Stations) నుంచి 19 యాత్రలు అందుబాటులో ఉన్నాయి.

South Central Railway Offer | నిబంధనలివి..

ఒక టికెట్‌లో గరిష్ఠంగా 8 బ్రేక్ ప్రయాణాలు చేయవచ్చు. వేర్వేరు రైళ్లు మారొచ్చు.
టికెట్ గడువు 56 రోజుల వరకు ఉంటుంది (దూరాన్ని బట్టి గడువు మారుతుంది).
వృద్ధులకు అదనపు రాయతీలు (పురుషులకు 40 శాతం, మహిళలకు 50 శాతం).

South Central Railway Offer | ఎక్కడెక్కడికి వెళ్లొచ్చంటే..

హైదరాబాద్(నాంపల్లి) స్టేషన్ నుంచి మంత్రాలయం- తిరుపతి- బెంగళూరు సిటీ- చెన్నై సెంట్రల్- భద్రాచలం – హైదరాబాద్(నాంపల్లి).
సికింద్రాబాద్ రైల్వే స్టేషన్ నుంచి బీజాపూర్- కొల్హాపూర్- వాస్కోడిగామా- మైసూర్- తిరుపతి- చెన్నై సెంట్రల్- భద్రాచలం రోడ్- హైదరాబాద్(నాంపల్లి).
కాచిగూడ రైల్వే స్టేషన్ నుంచి ఔరంగాబాద్- ఉజ్జయినీ- భద్రాచలం రోడ్- తిరుపతి- చెన్నై సెంట్రల్- బెంగళూరు సిటీ- మైసూర్- హుబ్లీ- సికింద్రాబాద్.
భద్రాచలం రోడ్ రైల్వే స్టేషన్ నుంచి పూరి- హౌరా- వారణాసి- ఫైజాబాద్- రిషికేష్- దిల్లీ-ముంబయి- హైదరాబాద్(నాంపల్లి).
వీటితో పాటు మరో 15 ప్రయాణాలకు కూడా సదుపాయం ఉంది.

South Central Railway Offer | బుకింగ్ ఇలా..

సికింద్రాబాద్, నాంపల్లి, కాచిగూడ స్టేషన్లలో డివిజనల్ కమర్షియల్ మేనేజర్ లేదా చీఫ్ రిజర్వేషన్ సూపర్‌వైజర్ కార్యాలయంలో సంప్రదించాలి.
ఎంపిక చేసిన ప్రయాణానికి సంబంధించి చార్జీలు లెక్కించి అధికారులు ఫాం ఇస్తారు.
ఆ ఫాంతో బుకింగ్ కౌంటర్‌లో ట్రైన్ టికెట్ తీసుకోవాలి. టికెట్ తీసుకున్న తర్వాత విడివిడిగా రిజర్వేషన్ చేయించుకోవాల్సి ఉంటుంది. రిజర్వేషన్ నిబంధనల ప్రకారమే బెర్త్ లభిస్తుంది. లేదంటే ఆర్​ఏసీ లేదా అన్‌రిజర్వ్‌డ్ కోచ్‌లో ప్రయాణం చేయవచ్చు.
పూర్తి వివరాల కోసం ఇండియన్ రైల్వే వెబ్‌సైట్‌ను సందర్శించండి.

ఇది కూడా చదవండి..: Delhi Liquor Scam Case | లిక్కర్​ స్కాం కేసు.. హైకోర్టును ఆశ్రయించిన సీబీఐ