అక్షరటుడే, వెబ్డెస్క్: Sri Rama Navami | భారతీయ సంస్కృతిలో మర్యాదా పురుషోత్తముడైన శ్రీరాముడి జన్మదినాన్ని ‘శ్రీరామ నవమి’గా ఎంతో వైభవంగా జరుపుకుంటాం. చైత్ర శుద్ధ నవమి నాడు వచ్చే ఈ పర్వదినం ఆధ్యాత్మికంగానే కాకుండా ఆరోగ్యపరంగా కూడా ఎంతో ప్రాముఖ్యతను సంతరించుకుంది. భక్తిశ్రద్ధలతో సీతారాముల కల్యాణాన్ని వీక్షించి, స్వామికి ఇష్టమైన పదార్థాలను నైవేద్యంగా పెట్టడం వల్ల మనసులోని కోరికలు నెరవేరుతాయని భక్తుల ప్రగాఢ విశ్వాసం.
Sri Rama Navami | నైవేద్యాల పరమార్థం:
శ్రీరామ నవమి అనగానే మనకు వెంటనే గుర్తుకు వచ్చేవి పానకం, వడపప్పు. వీటి వెనుక లోతైన శాస్త్రీయ, ఆధ్యాత్మిక అర్థాలు ఉన్నాయి. పానకాన్ని బెల్లం, మిరియాలు, యాలకుల కలిపి తయారు చేస్తారు. దీనిని సూర్య, అగ్ని తత్వాలకు ప్రతీకగా పెద్దలు చెబుతారు. ముఖ్యంగా వేసవి కాలం ప్రారంభంలో వచ్చే ఈ పండుగ నాడు వడపప్పు, చలిమిడిని నైవేద్యంగా తీసుకోవడం వల్ల శరీరంలోని ఉష్ణోగ్రత సమతుల్యంగా ఉంటుంది. ఇవి శరీరానికి చలువ చేసి, అరోగ్యాన్ని ప్రసాదిస్తాయి.
వనవాస కాలంలో రాముడు కందమూలాలు, రకరకాల అడవి పండ్లను ఆహారంగా తీసుకునేవారు. అందుకే పూజా సమయంలో వివిధ రకాల ఫలాలను నివేదించడం ఆనవాయితీగా వస్తోంది. అలాగే విష్ణువు అంశ అయిన రాముడికి తీపి పదార్థాలంటే ఎంతో ఇష్టం. అందుకే పరమాన్నం లేదా పాయసాన్ని భక్తితో సమర్పిస్తే ఆ ఇంట సుఖశాంతులు వెల్లివిరుస్తాయని పండితులు వివరిస్తున్నారు.
Sri Rama Navami | పూజా విధానం – మానసిక ప్రశాంతత:
రామయ్య పూజలో తులసి దళాలకు అత్యంత ప్రాధాన్యత ఉంటుంది. తులసితో అర్చించడం వల్ల అష్టైశ్వర్యాలు సిద్ధించడమే కాకుండా, మానసిక ఒత్తిడి తగ్గి ప్రశాంతత లభిస్తుంది. అలాగే మల్లె పూలు, సంపంగి వంటి సుగంధ పరిమళ పూలతో సీతారాములను పూజిస్తే.. దంపతుల మధ్య అన్యోన్యత పెరుగుతుంది. గృహంలో ఎలాంటి కలహాలు ఉన్నా తొలగిపోయి శాంతి నెలకొంటుంది.
ఇది కూడా చదవండి: Sri Rama Navami | శ్రీరామ నవమి ఎప్పుడు.. పండుగ తేదీపై పండితుల స్పష్టత ఇదే!
