అక్షరటుడే, వెబ్డెస్క్: Stock Market Fall | అమెరికా, ఇరాన్ల మధ్య మొదలైన యుద్ధం ఐదో రోజూ కొనసాగుతోంది. దాడులు, ప్రతిదాడులతో పశ్చిమాసియా అట్టుడుకుతోంది. హార్ముజ్ జలసంధి మూసివేతతో క్రూడ్ ఆయిల్ (Crude Oil) ధరలు 19 నెలల గరిష్టానికి చేరాయి. ఇది ప్రపంచాన్ని ఆందోళనకు గురిచేస్తోంది.
ముడి చమురు ధరలు పెరిగితే ద్రవ్యోల్బణం కట్టుతప్పే ప్రమాదం ఉండడంతో ఇన్వెస్టర్లు ఆందోళనకు గురై అమ్మకాలకు పాల్పడుతున్నారు. దీంతో స్టాక్ మార్కెట్లు రక్తమోడుతున్నాయి. క్రూడ్ ఆయిల్ ధర భారీగా పెరగడం, రూపాయి విలువ కొత్త కనిష్టాన్ని నమోదు చేయడంతో దేశీయ స్టాక్ మార్కెట్ (Domestic Stock Market) భారీగా పతనమైంది.
Stock Market Fall | భారీ నష్టాలతో ప్రారంభం..
దేశీయ స్టాక్ మార్కెట్ బుధవారం భారీ గ్యాప్ డౌన్తో ప్రారంభమైంది. బుధవారం ఉదయం సెన్సెక్స్ 1,710 పాయింట్ల నష్టంతో ప్రారంభమై మరో 85 పాయింట్లు కోల్పోయింది. కనిష్టాల వద్ద కొనుగోళ్ల మద్దతు లభించడంతో 1,084 పాయింట్లు ఎగబాకింది. నిఫ్టీ 477 పాయింట్ల నష్టంతో ప్రారంభమై మరో 83 పాయింట్లు నష్టపోయింది. ఇంట్రాడే కనిష్టాలనుంచి 297 పాయింట్లు పెరిగింది. మార్కెట్లు యుద్ధ భయాలనుంచి తేరుకుంటున్నట్లు కనిపించినా.. చివరి అరగంటలో ఇన్వెస్టర్లు అమ్మకాలకు పాల్పడడంతో సూచీలు పతనమయ్యాయి. చివరికి సెన్సెక్స్ 1,122 పాయింట్ల నష్టంతో 79,116 వద్ద, నిఫ్టీ 385 పాయింట్ల నష్టంతో 24,480 వద్ద స్థిరపడ్డాయి.
Stock Market Fall | ఐటీ మినహా..
ఐటీ మినహా మిగిలిన అన్ని రంగాల షేర్లు సెల్లాఫ్కు గురయ్యాయి. నిఫ్టీ (Nifty) ఐటీ ఇండెక్స్ 0.11 శాతం పెరిగింది. మెటల్ ఇండెక్స్ 3.99 శాతం, రియాలిటీ 3.11 శాతం, ఆయిల్ అండ్ గ్యాస్ 3.09 శాతం, మీడియా 3.05 శాతం, క్యాపిటల్ గూడ్స్ ఇండెక్స్ 2.64 శాతం, పవర్ 2.59 శాతం, ఆటో ఇండెక్స్ 2.44 శాతం, ఎనర్జీ 2.23 శాతం, యుటిలిటీ 2.19 శాతం క్షీణించాయి.
Stock Market Fall | అడ్వాన్సెస్ అండ్ డిక్లయిన్స్..
బీఎస్ఈలో నమోదైన కంపెనీలలో 1,053 కంపెనీలు లాభపడగా 3,245 స్టాక్స్ నష్టపోయాయి. 135 కంపెనీలు ఫ్లాట్గా ముగిశాయి. 53 కంపెనీలు 52 వారాల గరిష్టాల వద్ద ఉండగా.. 719 కంపెనీలు 52 వారాల కనిష్టాల వద్ద కదలాడాయి. 8 కంపెనీలు అప్పర్ సర్క్యూట్ను, 9 కంపెనీలు లోయర్ సర్క్యూట్ను తాకాయి. బీఎస్ఈలో నమోదైన కంపెనీల సంపద విలువ రూ. 9 లక్షల కోట్లమేర ఆవిరయ్యింది.
Gainers : బీఎస్ఈ సెన్సెక్స్లో 3 కంపెనీలు లాభాలతో, 27 కంపెనీలు నష్టాలతో ముగిశాయి. ఎయిర్టెల్ 1.78 శాతం, ఇన్ఫోసిస్ 1.50 శాతం, టెక్ మహీంద్రా 0.51 శాతం లాభపడ్డాయి.
Losers : టాటా స్టీల్ 6.76 శాతం, ఎల్టీ 4.53 శాతం, బజాజ్ ఫైనాన్స్ 3.36 శాతం, అల్ట్రాటెక్ సిమెంట్ 3.32 శాతం, ఎన్టీపీసీ 3.07 శాతం నష్టపోయాయి.
ఇది కూడా చదవండి..: Crude Oil Prices | కలవరపెడుతున్న క్రూడ్ ఆయిల్ ధరలు.. భారీ నష్టాల్లో గ్లోబల్ మార్కెట్లు
