అక్షరటుడే, ఇందూరు: Summer Health Tips | వేసవి కాలం ప్రారంభమవుతున్న వేళ ప్రజలు ఆరోగ్యంపై ప్రత్యేక శ్రద్ధ తీసుకోవాల్సిన అవసరాన్ని వైద్యులు ప్రస్తావిస్తున్నారు. రాత్రి వేళల్లో చల్లదనం ఉండగా, పగటి సమయంలో ఎండలు తీవ్రంగా పెరుగుతున్న నేపథ్యంలో శరీరంపై ప్రతికూల ప్రభావం పడే అవకాశముందని హెచ్చరిస్తున్నారు.
Summer Health Tips | వేసవిలో వచ్చే ఆరోగ్య సమస్యలు..
వేసవిలో తీసుకోవాల్సిన జాగ్రత్తల గురించి నిజామాబాద్లోని మెడికవర్ హాస్పిటల్స్కు చెందిన జనరల్ ఫిజీషియన్ డాక్టర్ ఆనంద్ మాలు వివరిస్తున్నారు. వేసవి కాలంలో అధిక ఉష్ణోగ్రతల కారణంగా హీట్ స్ట్రోక్, డయేరియా (విరోచనాలు), జాండిస్ (పచ్చకామెర్లు) వంటి వ్యాధులు ఎక్కువగా వచ్చే ప్రమాదం ఉందని హెచ్చరిస్తున్నారు.
Summer Health Tips | ఇలా చేస్తే బెటర్..
ఈ నేపథ్యంలో ప్రజలు కొన్ని జాగ్రత్తలు తప్పనిసరిగా పాటించాలని వైద్యుడు సూచిస్తున్నారు. రోజుకు కనీసం 3 నుంచి 4 లీటర్ల వరకు నీరు తాగడం అవసరమని స్పష్టం చేస్తున్నారు. ముఖ్యంగా మరిగించిన లేదా ఫిల్టర్ చేసిన శుభ్రమైన నీటినే వినియోగించాలని చెబుతున్నారు. అత్యవసరం అయితే తప్ప బయటకు వెళ్లొద్దంటున్నారు. బయటకు వెళ్లే సమయంలో తలపై తప్పకుండా క్యాప్ / టవల్ ధరించాలని, మధ్యాహ్నం 12 గంటల నుంచి సాయంత్రం 4 గంటల వరకు ఎండలో తిరగడం నివారించాలని స్పష్టం చేస్తున్నారు.
తేలికపాటి, పలుచని దుస్తులు ధరించడం మంచిదని డాక్టర్ చెబుతున్నారు. మజ్జిగ, కొబ్బరి నీరు, నిమ్మరసం వంటి ద్రవాలను ఎక్కువగా తీసుకోవడం ద్వారా శరీరాన్ని హైడ్రేటెడ్గా ఉంచుకోవచ్చని సూచిస్తున్నారు. బయట ఆహారానికి దూరంగా ఉండాలని, పరిశుభ్రత పాటిస్తూ చేతులను తరచూ శుభ్రంగా కడుక్కోవాలని సూచిస్తున్నారు.
పిల్లలు, వృద్ధులపై ప్రత్యేక శ్రద్ధ అవసరమని స్పష్టం చేస్తున్నారు. ఎవరికైనా విరోచనాలు, వాంతులు, జ్వరం లేదా కళ్ళు, చర్మం పసుపు రంగులోకి మారడం వంటి లక్షణాలు కనిపిస్తే వెంటనే వైద్యులను సంప్రదించాలని అంటున్నారు.
ఇది కూడా చదవండి: Sleep Fatigue Causes | కంటి నిండా నిద్రపోయినా అలసటగా అనిపిస్తోందా.. అయితే ఈ సమస్యలు ఉన్నట్టే!
