అక్షరటుడే, హైదరాబాద్: Tadbund Hanuman Temple | గ్రేటర్ హైదరాబాద్లోని తాడ్బండ్లో ఉన్న హనుమాన్ ఆలయం ఎంతో ప్రసిద్ధి చెందిన ఆధ్యాత్మిక క్షేత్రం. నిత్యం వందల మంది స్వామి వారిని దర్శించుకుంటారు. కాగా, ఇటీవల ఈ ఆలయం ప్రత్యేక ఆకర్షణగా మారింది. ముఖ్యంగా ప్రతి శనివారం రాత్రి ఇక్కడ జరిగే భజన కార్యక్రమాలు ప్రత్యేకతను సంతరించుకున్నాయి. ముఖ్యంగా శనివారం జెన్-జీ యువతకు కొత్త “నైట్ స్పాట్”గా మారింది.
Tadbund Hanuman Temple | పారాయణం
ఆలయం శనివారం రాత్రి ప్రత్యేకంగా అర్ధరాత్రి వరకు తెరిచి ఉంచడంతో వందలాది మంది యువతీయువకులు ఇక్కడికి చేరుకుంటున్నారు. భజనలు, కీర్తనలు, హనుమాన్ చాలీసా పారాయణంతో తరిస్తున్నారు. భక్తి భావంతో ఆంజనేయస్వామిని కొలుస్తున్నారు. ఆధ్యాత్మిక వాతావరణంలో యువత గుంపులుగా కూర్చొని భజన చేయడం ప్రత్యేక ఆకర్షణగా మారింది.
తాడ్బండ్ హనుమాన్ ఆలయంలో శనివారం రాత్రి భజన సంప్రదాయం దశాబ్దాలుగా కొనసాగుతోంది. రాత్రి 9 గంటల తర్వాత ప్రారంభమయ్యే భజనలు అర్ధరాత్రి వరకు కొనసాగుతూనే ఉంటాయి. అనంతరం ప్రత్యేక హారతి ఇస్తారు. ఈ ఆధ్యాత్మిక కార్యక్రమాల్లో సాధారణంగా వందలాది మంది భక్తులు భాగస్వామ్యమవుతారు.
Tadbund Hanuman Temple | స్పిరిచువల్ నైట్ కల్చర్
ఇటీవల సామాజిక మాధ్యమాల్లో ఈ భజన వేడుకలు వైరల్ కావడంతో యువతలో ఆసక్తి మరింత పెరిగింది. ఫలితంగా ప్రతి శనివారం రాత్రి ఆలయం వద్ద భారీగా యువత చేరుకుంటోంది. కొందరు దీనిని “స్పిరిచువల్ నైట్ కల్చర్”గా వర్ణిస్తున్నారు.
సంగీతం, భక్తి, సామూహిక ప్రార్థనలతో నిండిన ఈ భజన కార్యక్రమాలు యువతను ఆధ్యాత్మికత వైపు మళ్లిస్తున్నాయని ఆలయ పురోహితులు చెబుతున్నారు. రాత్రి ఆలయంలో వినిపించే భజనలు, మంత్రోచ్ఛారణలతో ఈ ప్రాంతమంతా ఆధ్యాత్మిక శోభను సంతరించుకుంది.
