అక్షరటుడే, వెబ్డెస్క్ : Trump Pharma Tariffs | అమెరికా అధ్యక్షుడు డొనాల్డ్ ట్రంప్ నిత్యం వార్తల్లో ఉండడం కోసం సంచలన వ్యాఖ్యలు చేస్తుంటారు. సుంకాలతో భయపెట్టడం ఆయనకు హాబీగా మారిపోయింది.
మేక్ అమెరికా గ్రేట్ అగైన్ (Make America Great Again) నినాదంతో ఎన్నికల బరిలో నిలిచి రెండోసారి అధ్యక్షుడిగా ఎన్నికయ్యాక పరిస్థితి మరింత దిగజారింది. శత్రుదేశమా, మిత్రదేశమా అన్న విషయాలను పరిగణనలోకి తీసుకోకుండా ఇష్టారీతిన పన్నులు బాదుతూ ముందుకు వెళ్తున్నారు. తమతో ట్రేడ్ అగ్రిమెంట్ కుదుర్చుకోని దేశాలపై ఎడాపెడా రెసిప్రోకల్ టారిఫ్స్ విధించారు.
Trump Pharma Tariffs | ఈసారి ఫార్మా వంతు..
అమెరికా అధ్యక్షుడు డొనాల్డ్ ట్రంప్ ఇతర దేశాలపై ఎడాపెడా విధించిన టారిఫ్లను చట్ట విరుద్ధమంటూ అక్కడి సుప్రీం కోర్టు (Supreme Court) తీర్పు ఇచ్చినా ఆయన తీరులో మార్పు కనిపించడం లేదు. కొత్తకొత్త పన్నులతో ఆయన ముందుకు వస్తూనే ఉన్నారు. తాజాగా ఫార్మా ఉత్పత్తులపై టారిఫ్ బాంబు వేశారు. కొన్నిరకాల పేటెంట్ ఔషధాలపై 100 శాతం వరకు సుంకాలు విధించేలా ఎగ్జిక్యూటివ్ ఆర్డర్ (Executive Order)పై ట్రంప్ సంతకం చేయడం గమనార్హం.
Trump Pharma Tariffs | యూఎస్లో ఉత్పత్తి చేస్తే మినహాయింపులు..
‘మోస్ట్ ఫేవర్డ’ కింద ఒప్పందాలు చేసుకున్న ఫార్మా కంపెనీలు (Pharmaceutical Companies) అమెరికాలో ఉత్పత్తి కేంద్రాలను ఏర్పాటుచేస్తే వాటి పేటెంట్, ఇతర ఉత్పత్తులకు ఎలాంటి సుంకాలు ఉండవని, ఒప్పందం చేసుకోని కంపెనీలు అలాంటి ప్రాజెక్టులు చేపడితే మాత్రం సుంకాలు వర్తిస్తాయని ఎగ్జిక్యూటివ్ ఆర్డర్లో పేర్కొన్నారు. అలాంటి సంస్థలు ఉత్పత్తి చేసే ఔషధాలపై మొదట 20శాతం సుంకాలు విధించనున్నారు. వచ్చే నాలుగేళ్లలో వీటిని వంద శాతానికి పెంచుతారు. కాగా ఒప్పందం చేసుకోవడానికి ట్రంప్ కొంత గడువు ఇచ్చారు. టారిఫ్లపై చర్చలు జరిపేందుకు పెద్ద కంపెనీలకు 120 రోజులు, మిగతా సంస్థలకు 180 రోజుల గడువిచ్చారు. ప్రస్తుతానికి జనరిక్, బయోసిమిలర్, అత్యవసర మందులకు ఈ పన్ను నుంచి మినహాయింపు ఇచ్చారు.
Trump Pharma Tariffs | మన కంపెనీలపై ప్రభావమెంత?
విదేశాల నుంచి దిగుమతయ్యే పేటెంట్ పొందిన మందులపై నూరు శాతం పన్ను విధిస్తామన్న ట్రంప్ ప్రకటనతో దేశీయ ఫార్మా కంపెనీలు ఒత్తిడికి గురవుతున్నాయి. గత సెషన్లో అమెరికాకు ఎగుమతులు చేసే ఫార్మా కంపెనీల షేర్ల ధరలు పడిపోయాయి. అయితే ప్రస్తుతానికి మన కంపెనీలపై పెద్దగా ప్రభావం ఉండదన్న అభిప్రాయం వ్యక్తమవుతోంది. ఎందుకంటే మన కంపెనీలు ఎక్కువగా జనరిక్ మందులను అమెరికాకు ఎగుమతి చేస్తుంటాయి. ఈ మందులపై ప్రస్తుతం పన్ను లేకపోవడంతో భారత ఫార్మా రంగానికి టారిఫ్ల భారం ప్రస్తుతానికి లేనట్లేనని భావిస్తున్నారు. భవిష్యత్తులో జనరిక్ మందులపై పన్నులు విధిస్తే మాత్రం భారత కంపెనీలకు నష్టం వాటిల్లే అవకాశాలున్నాయి. ప్రస్తుతానికి డాక్టర్ రెడ్డీస్, సన్ఫార్మా, బయోకాన్ వంటి కంపెనీలు జనరిక్ మందులతో పాటు పేటెంట్ పొందిన మందులు కూడా అమెరికాలో విక్రయిస్తున్నాయి. ఆయా కంపెనీలపై పన్నుల భారం పడే అవకాశం ఉంది.
ఇది కూడా చదవండి..: Iran B1 Bridge Attack | ఇరాన్ B1 వంతెన ధ్వంసంపై స్పందించిన ఇరాన్.. గల్ఫ్లోని 8 వంతెనల ‘హిట్-లిస్ట్’ విడుదల
