అక్షరటుడే, వెబ్డెస్క్: TTD Demonetized Notes | తిరుమలలోని తిరుమల వెంకటేశ్వరస్వామి ఆలయం (Tirumala Venkateswara Temple) హుండీలో భక్తులు సమర్పిస్తున్న పాత నోట్ల సమస్య రోజురోజుకు తీవ్రమవుతోంది. టీటీడీకి ఇది పెద్ద సవాలుగా మారింది.
తాజా అంచనాల ప్రకారం, రూ.500, రూ.1000 పాత నోట్ల రూపంలో దాదాపు రూ.400 కోట్ల మేర నిధులు హుండీలో పేరుకుపోయినట్లు తెలుస్తోంది. దేశంలో పెద్ద నోట్ల రద్దు జరిగినప్పటికీ, భక్తులు తమ మొక్కులు తీర్చుకునే క్రమంలో ఇప్పటికీ ఈ పాత నోట్లను హుండీలో వేస్తూనే ఉన్నారు. భక్తి భావంతో సమర్పించిన కానుకలను తిరస్కరించడం టీటీడీ (TTD)కి సాధ్యం కాకపోవడంతో, ఈ నోట్లను స్వీకరించక తప్పడం లేదు.
TTD Demonetized Notes | పరకామణిలో వేరు చేసి నిల్వ
హుండీ లెక్కింపు (పరకామణి) సమయంలో సిబ్బంది ఈ పాత నోట్లను ప్రత్యేకంగా వేరు చేసి భద్రపరుస్తున్నారు. అయితే సంవత్సరాలు గడిచేకొద్దీ ఈ మొత్తం భారీగా పేరుకుపోయి ఇప్పుడు వందల కోట్లకు చేరింది. వినియోగించలేని ఈ నిధులు టీటీడీకి ఆర్థికంగా ఉపయోగపడకపోవడం ఆందోళన కలిగిస్తోంది.ఈ సమస్య పరిష్కారానికి టీటీడీ యాజమాన్యం పలుమార్లు కేంద్ర ప్రభుత్వాన్ని రిజర్వ్ బ్యాంక్ ఆఫ్ ఇండియా (Reserve Bank of India) ను ఆశ్రయించింది. రద్దు నోట్లను మార్పిడి చేసుకునేందుకు ప్రత్యేక అనుమతి ఇవ్వాలని విజ్ఞప్తి చేసినప్పటికీ ఇప్పటివరకు ఎలాంటి నిర్ణయం వెలువడలేదు. టీటీడీకి ప్రత్యేకంగా అనుమతి ఇస్తే ఇతర సంస్థలు కూడా ఇదే విధంగా డిమాండ్ చేసే అవకాశం ఉందన్న కారణంతో కేంద్రం వెనుకంజ వేస్తోందని సమాచారం.
TTD Demonetized Notes | రూ.35 లక్షల విలువైన రూ.2000 నోట్లు
ఇదిలా ఉంటే, రద్దు చేసిన రూ.2000 నోట్లను కూడా భక్తులు హుండీలో సమర్పిస్తున్నారు. టీటీడీ అధికారులు (TTD Officers) తెలిపిన వివరాల ప్రకారం, ప్రతి నెల సుమారు రూ.35 లక్షల విలువైన రూ.2000 నోట్లు హుండీలో వస్తున్నాయి. వీటిని ప్రతి రెండు నెలలకు ఒకసారి చెన్నైలోని ఆర్బీఐ ప్రాంతీయ కార్యాలయంలో మార్పిడి చేసుకుంటున్నారు. రూ.400 కోట్లకు చేరిన పాత నోట్లను వినియోగించలేకపోవడం టీటీడీకి పెద్ద ఇబ్బందిగా మారింది. ఈ నిధులు ఆలయ అభివృద్ధి, ధార్మిక కార్యక్రమాలు, సేవా కార్యక్రమాలకు ఉపయోగపడే అవకాశం ఉన్నప్పటికీ, ప్రస్తుతం అవి నిల్వలోనే ఉండిపోతున్నాయి. ఈ సమస్యకు కేంద్రం, ఆర్బీఐ నుంచి ప్రత్యేక అనుమతి వచ్చినప్పుడే పరిష్కారం లభించే అవకాశముంది. అప్పటి వరకు హుండీలో పాత నోట్ల రూపంలో పేరుకుపోతున్న నిధులు టీటీడీకి తలనొప్పిగానే మిగిలే పరిస్థితి కనిపిస్తోంది.
ఇది కూడా చదవండి..: Karna | కర్ణ మరణం నుంచి కష్టాల వరకు.. ‘సవాలక్ష’ అనే పదం ఎలా వచ్చిందంటే!
