అక్షరటుడే, వెబ్డెస్క్: Vijay Rashmika Wedding | టాలీవుడ్ క్యూట్ కపుల్ విజయ్ దేవరకొండ-రష్మిక వివాహ బంధంతో ఒక్కటయ్యారు. ఈ గురువారం రాజస్థాన్లోని ఉదయ్పూర్ (Udaypur) ప్యాలెస్లో అత్యంత వైభవంగా వీరి వివాహం జరిగింది.
రాజుల పెళ్లిని తలపించేలా ఘనంగా జరిగిన ఈ వేడుకలో అత్యంత సన్నిహిత బంధుమిత్రులు, స్నేహితులు మాత్రమే పాల్గొన్నారు. పెళ్లి ఫొటోలను ఈ జంట సోషల్ మీడియాలో పంచుకోగా, దేశవ్యాప్తంగా శుభాకాంక్షల వెల్లువెత్తుతోంది. తాజాగా ఈ కొత్త దంపతులు హైదరాబాద్కు చేరుకుని రిసెప్షన్ ఏర్పాట్లలో నిమగ్నమయ్యారు.
Vijay Rashmika Wedding | మార్చి 4న గ్రాండ్ రిసెప్షన్
మార్చి 4న హైదరాబాద్ (Hyderabad)లో ఘనంగా వెడ్డింగ్ రిసెప్షన్ నిర్వహించేందుకు ఏర్పాట్లు చేస్తున్నారు. సినీ పరిశ్రమకు చెందిన ప్రముఖులతో పాటు రాజకీయ ప్రముఖులు కూడా హాజరుకానున్నట్లు సమాచారం. కుటుంబ సభ్యులు, స్నేహితులు పెద్ద ఎత్తున పాల్గొనే ఈ వేడుక టాలీవుడ్లో మరో హాట్ టాపిక్గా మారింది. ఇదిలా ఉండగా, తమ ప్రేమకు, ఆశీస్సులకు ప్రతిగా దేశ ప్రజలకు ప్రత్యేక రిటర్న్ గిఫ్ట్ ఇవ్వాలని విరోష్ జంట నిర్ణయించింది. మార్చి 1న దేశవ్యాప్తంగా పలు నగరాల్లో స్వీట్లు (Sweets) పంపిణీ చేయడంతో పాటు దేవాలయాల్లో అన్నదానం నిర్వహిస్తున్నట్లు ప్రకటించారు. సోషల్ మీడియా ద్వారా తమ కృతజ్ఞతను తెలియజేస్తూ, “మా జీవిత ప్రయాణంలో ఈ దేశ ప్రజలందరూ ఒక భాగం. మా వివాహ సందర్భంగా మీరు చూపించిన ప్రేమకు కృతజ్ఞతలు. ఈ ఆనందాన్ని మీతో పంచుకునేందుకు స్వీట్లు పంపుతున్నాం. వివిధ నగరాల్లోని దేవాలయాల్లో అన్నదానం నిర్వహిస్తున్నాం. మీ ఆశీస్సులు ఎల్లప్పుడూ మాపై ఉండాలి” అని పేర్కొన్నారు.
Vijay Rashmika Wedding | మరోచిత్రంలో..
తెలంగాణ, ఆంధ్రప్రదేశ్తో పాటు ఢిల్లీ, చండీగఢ్, ఉత్తరప్రదేశ్, గుజరాత్, మధ్యప్రదేశ్, మహారాష్ట్ర, రాజస్థాన్, కేరళ, కర్ణాటక, తమిళనాడు, పుదుచ్చేరి, బీహార్ రాష్ట్రాల్లోని పలు నగరాల్లో ఈ స్వీట్ల పంపిణీ, అన్నదాన కార్యక్రమాలు జరుగుతున్నాయి. ముఖ్య దేవాలయాల్లో భక్తులకు అన్నదానం నిర్వహిస్తూ, అభిమానులతో తమ సంతోషాన్ని పంచుకుంటున్నారు. విజయ్, రష్మికల పరిచయం గీతా గోవిందం చిత్రంతో ప్రారంభమైంది. ఆ తర్వాత డియర్ కామ్రేడ్ (Dear Comrade) సినిమాలో కలిసి నటించారు. ఈ రెండు చిత్రాల సమయంలోనే వీరి మధ్య ప్రేమ మొదలైందని అప్పట్లో వార్తలు వచ్చాయి. ఏడేళ్ల ప్రేమ ప్రయాణం అనంతరం ఫిబ్రవరి 26న పెళ్లి చేసుకుని జీవితంలో కొత్త అధ్యాయాన్ని ప్రారంభించారు. ప్రస్తుతం ‘రణబాలి’ అనే చిత్రంలో మరోసారి కలిసి నటిస్తుండటం విశేషం.
