అక్షరటుడే, వెబ్డెస్క్: Visakhapatnam Firecracker Explosion | విశాఖపట్నం నగరంలో ఆదివారం రాత్రి భారీ పేలుడు సంభవించి స్థానికులను ఉలిక్కిపడేలా చేసింది. గోపాలపట్నం పరిధిలోని మహాత్మా ఆదర్శనగర్ (Mahatma Adarshnagar) ప్రాంతంలో ఓ ఇంట్లో అక్రమంగా నిల్వ ఉంచిన బాణసంచా సామగ్రి ఒక్కసారిగా పేలిపోవడంతో తీవ్ర నష్టం జరిగింది.
Visakhapatnam Firecracker Explosion | ఓ ఇంటిని అద్దెకు తీసుకుని
ఈ పేలుడు శబ్దం సుమారు మూడు కిలోమీటర్ల దూరం వరకు వినిపించడంతో చుట్టుపక్కల ప్రాంతాల్లో ప్రజలు భయాందోళనకు గురయ్యారు. స్థానికంగా ‘బాంబుల శివ’గా పిలిచే డి. శివకృష్ణకుమార్ (40) అనే వ్యక్తి శ్మశానవాటిక సమీపంలో ఓ ఇంటిని అద్దెకు తీసుకుని అందులో అక్రమంగా బాణసంచా తయారు చేసి విక్రయిస్తున్నట్లు సమాచారం. ఈ నెల 18న జరగనున్న ఉత్సవాల కోసం అతడు పెద్దఎత్తున బాణసంచా సామగ్రి, మందుగుండు పదార్థాలను అక్కడ నిల్వ చేసినట్లు అధికారులు చెబుతున్నారు.
Visakhapatnam Firecracker Explosion | అక్రమంగా తయారీ..
ఆదివారం రాత్రి సుమారు 8 గంటల సమయంలో ఆ ఇంటి నుంచి ఒక్కసారిగా దట్టమైన పొగలు రావడం ప్రారంభమైంది. కొద్దిసేపటికే భారీ శబ్దాలతో పేలుళ్లు సంభవించాయి. ఈ పేలుళ్ల ప్రభావంతో ఇంటి గోడలు కూలిపోయి సమీపంలోని రేకుల షెడ్లపై పడ్డాయి. చుట్టుపక్కల ఉన్న ఇళ్ల గోడలకు కూడా పగుళ్లు ఏర్పడ్డాయి. పేలుడు తీవ్రత కారణంగా ఇంట్లో ఉన్న ద్విచక్ర వాహనం పూర్తిగా ధ్వంసమైంది. అలాగే ఇంట్లో ఉన్న ఇతర వస్తువులు కూడా నాశనమయ్యాయి. శ్లాబ్ పెచ్చులు పక్కింటిపై పడటంతో ఓ మహిళ స్వల్పంగా గాయపడింది. ఆమెను వెంటనే సమీప ఆసుపత్రికి తరలించి చికిత్స అందిస్తున్నారు. సమాచారం అందుకున్న మర్రిపాలెం (Marripalem) అగ్నిమాపక సిబ్బంది వెంటనే ఘటనాస్థలానికి చేరుకుని మంటలను అదుపులోకి తెచ్చారు. అయితే ప్రమాదం జరిగిన వెంటనే నిందితుడు శివ అక్కడి నుంచి పరారయ్యాడు.
Visakhapatnam Firecracker Explosion | పోలీసు కేసు నమోదు
ఈ ఘటనపై గోపాలపట్నం సీఐ సన్యాసినాయుడు (CI Sanyasi Naidu) ఆధ్వర్యంలో పోలీసులు కేసు నమోదు చేసి దర్యాప్తు చేపట్టారు. అక్రమంగా బాణసంచా తయారీ, నిల్వ కారణంగానే ఈ ప్రమాదం జరిగిందని పోలీసులు అనుమానిస్తున్నారు. ప్రస్తుతం పరారీలో ఉన్న నిందితుడిని పట్టుకునేందుకు పోలీసులు ప్రత్యేక బృందాలతో గాలింపు చర్యలు చేపట్టారు. ఈ ఘటనతో స్థానికంగా తీవ్ర భయాందోళనలు నెలకొన్నాయి. నివాస ప్రాంతాల్లో ఇలాంటి అక్రమ బాణసంచా తయారీ కేంద్రాలు కొనసాగుతున్నాయన్న ఆరోపణలు కూడా వినిపిస్తున్నాయి. అధికారులు ఇటువంటి కార్యకలాపాలపై కఠిన చర్యలు తీసుకోవాలని స్థానికులు డిమాండ్ చేస్తున్నారు.
ఇది కూడా చదవండి..: Putta Mahesh | డ్రగ్స్ ఆరోపణలపై పార్టీ అధిష్ఠానం సీరియస్.. ఎంపీ పుట్టా వివరణ!
