అక్షరటుడే, వెబ్డెస్క్ : WhatsApp Username Feature | ప్రపంచవ్యాప్తంగా కోట్లాది మంది ఉపయోగిస్తున్న మెసేజింగ్ యాప్ వాట్సాప్ వినియోగదారులకు (WhatsApp Users) ఒక కీలక అప్డేట్ రానుంది. ఇప్పటి వరకు ఈ యాప్ పూర్తిగా మొబైల్ నంబర్లపై ఆధారపడి పనిచేస్తుండగా, ఇకపై యూజర్నేమ్ ఆధారంగా కమ్యూనికేషన్ సదుపాయాన్ని అందుబాటులోకి తీసుకురాబోతోంది. ఈ ఫీచర్ ప్రస్తుతం పరీక్ష దశలో ఉండగా, త్వరలోనే సాధారణ వినియోగదారులకు అందుబాటులోకి వచ్చే అవకాశం ఉందని సమాచారం.
ఈ కొత్త విధానం ద్వారా వినియోగదారులు తమ ఫోన్ నంబర్ను ఇతరులతో షేర్ చేయాల్సిన అవసరం ఉండదు. ముఖ్యంగా ప్రైవసీ విషయంలో ఆందోళన చెందే వారికి ఇది పెద్ద ఉపశమనం కానుంది. ఇప్పటి వరకు తెలియని వ్యక్తులతో మాట్లాడాలంటే తప్పనిసరిగా నంబర్ ఇవ్వాల్సి వచ్చేది. కానీ యూజర్నేమ్ వ్యవస్థ అమల్లోకి వచ్చిన తర్వాత, ఒక ప్రత్యేక పేరుతోనే చాట్ చేయడం, వాయిస్ కాల్స్, వీడియో కాల్స్ చేయడం సాధ్యమవుతుంది.
WhatsApp Username Feature | సాధారణ యూజర్స్కి కూడా..
యూజర్నేమ్ ఫీచర్ పూర్తిగా ఆప్షనల్గా ఉండనుంది. అంటే వినియోగదారుడు కోరుకుంటేనే దీనిని ఉపయోగించుకోవచ్చు. లేకపోతే పాత విధానంలోనే ఫోన్ నంబర్ ఆధారంగా యాప్ను ఉపయోగించుకోవచ్చు. ఈ ఫీచర్ మొదట వ్యాపార ఖాతాలకు మాత్రమే వస్తుందని భావించినప్పటికీ, ఇప్పుడు సాధారణ యూజర్లకు కూడా అందుబాటులోకి తీసుకురానున్నారు. వ్యాపార ఖాతాల కోసం ప్రత్యేకంగా బిజినెస్-స్కోప్ యూజర్ ఐడీ అనే విధానాన్ని ప్రవేశపెట్టే ఆలోచనలో ఉన్నారు. దీని ద్వారా కంపెనీలు తమ కస్టమర్లతో నేరుగా కనెక్ట్ అవ్వగలుగుతాయి. ఉదాహరణకు, ఒక బ్యాంక్ లేదా సర్వీస్ సంస్థకు ప్రత్యేక యూజర్నేమ్ ఉండి, వినియోగదారులు నంబర్ అవసరం లేకుండా నేరుగా వారిని సంప్రదించవచ్చు.
WhatsApp Username Feature | ముఖ్య విషయం ఏమిటంటే..
మరో ముఖ్య విషయం ఏమిటంటే, ఈ ఫీచర్ పూర్తిస్థాయిలో విడుదలకు ముందే యూజర్నేమ్ రిజర్వ్ చేసుకునే అవకాశం ఇవ్వవచ్చని తెలుస్తోంది. అంటే వినియోగదారులు తమకు నచ్చిన యూజర్నేమ్ను (Username) ముందుగానే నమోదు చేసుకునే వీలుంటుంది. మీడియా నివేదికల ప్రకారం, ఈ యూజర్నేమ్ ఫీచర్ 2026 జూన్ నాటికి అందుబాటులోకి వచ్చే అవకాశాలు ఉన్నాయి. అయితే దీనిపై అధికారిక ప్రకటన కోసం వినియోగదారులు ఆసక్తిగా ఎదురుచూస్తున్నారు.
ఇది కూడా చదవండి..: ఏఐ కంప్యూట్ రంగంలో సంచలనం: ఓఎక్స్ఎంఐక్యూ ల్యాబ్స్ ఏఎం ఇంటెలిజెన్స్ ల్యాబ్స్ భారీ ఒప్పందం
