అక్షరటుడే, వెబ్డెస్క్: Iran US Tensions | పశ్చిమాసియాలో ఉద్రిక్తతలు చల్లారడం లేదు. ఓ వైపు సీజ్ఫైర్ అమలులోకి వచ్చినా.. అమెరికా, ఇరాన్ మధ్య చర్చలు విఫలం కావడంతో ఆందోళన నెలకొంది. మరోవైపు ఇరు దేశాలు చేస్తున్న ప్రకటనలతో ప్రపంచంలో చమురు సంక్షోభం వస్తుందనే ఆందోళనలు నెలకొన్నాయి.
హర్ముజ్ జలసంధి (Strait of Hormuz)లోని ఇరాన్ ఓడరేవుల నుంచి రాకపోకలు సాగించే అన్ని నౌకలపై అమెరికా దిగ్బంధనం విధించిన విషయం తెలిసిందే. దీంతో గల్ఫ్, ఒమన్ సముద్రంలోని ఏ ఓడరేవు కూడా సురక్షితంగా ఉండదని ఇరాన్ ఇస్లామిక్ రివల్యూషనరీ గార్డ్ కార్ప్స్ (IRGC) సోమవారం హెచ్చరించింది. గల్ఫ్, ఒమన్ సముద్రంలోని ఓడరేవుల భద్రత అందరి కోసమైనా ఉండాలి, లేక ఎవరి కోసమూ ఉండకూడదు అని పేర్కొంది.
Iran US Tensions | చూస్తూ ఊరుకోం
తమ భద్రతకు ముప్పు వాటిల్లితే చూస్తూ ఊరుకోమని ఇరాన్ తెలిపింది. పర్షియన్ గల్ఫ్ (Persian Gulf) సముద్రం భద్రత ప్రమాదంలో పడుతుందని హెచ్చరించింది. ఇరాన్ ప్రాదేశిక జలాలపై సార్వభౌమాధికారాన్ని చెలాయించడం ఇరాన్ జాతి సహజ హక్కు అని పేర్కొంది. శత్రు దేశాలకు సంబంధం ఉన్న నౌకలకు హర్ముజ్ జలసంధి మీదుగా ప్రవేశం లేదని చెప్పింది. అయితే టెహ్రాన్ నిర్దేశించిన నిబంధనలకు లోబడి ఇతర నౌకలు ప్రయాణించవచ్చని తెలిపింది.
Iran US Tensions | పటిష్ట యంత్రాంగం
శత్రువుల నుంచి కొనసాగుతున్న ముప్పు నేపథ్యంలో యుద్ధం తర్వాత కూడా హర్ముజ్ జలసంధిని నియంత్రించడానికి ఇరాన్ ఒక శాశ్వత యంత్రాంగాన్ని పటిష్టంగా అమలు చేస్తుంది అని ఐఆర్జిసి పేర్కొంది. అంతర్జాతీయ జలాల్లో సముద్రయానంపై నేరపూరితమైన అమెరికా విధించిన ఆంక్షలు చట్టవిరుద్ధమైనవి తెలిపింది. కాగా సోమవారం మధ్యాహ్నం 2 గంటల నుంచి ఇరాన్ ఓడరేవులపై దిగ్బంధనాన్ని అమలు చేస్తామని అమెరికా తెలిపింది. అటు ఇరాన్, ఇటు అమెరికా నౌకలను దిగ్బంధిస్తే ప్రపంచ వ్యాప్తంగా చమురు ధరలు భారీగా పెరగనున్నాయి. దీంతో అన్ని దేశాలు ఆందోళన చెందుతున్నాయి.
ఇది కూడా చదవండి..: Hormuz Strait blockade | హర్ముజ్ జలసంధిని దిగ్బంధిస్తాం.. ట్రంప్ సంచలన వ్యాఖ్యలు
