Drinking Water Supply | తాగునీటి ఇబ్బందుల్లేకుండా చూడాలి..: కలెక్టర్ ఇలా త్రిపాఠి ఆదేశం

అక్షరటుడే, భీమ్​గల్: Drinking Water Supply | జిల్లాలో వేసవి తీవ్రత దృష్ట్యా ప్రజలకు తాగునీటి ఇబ్బందులు తలెత్తకుండా యంత్రాంగం అప్రమత్తంగా ఉండాలని జిల్లా కలెక్టర్ ఇలా త్రిపాఠి (Collector Ila Tripathi) అధికారులను ఆదేశించారు. భీమ్​గల్​ మండల పరిషత్ కార్యాలయంలో బుధవారం బాల్కొండ నియోజకవర్గ స్థాయి అధికారులతో ఆమె నీటిసరఫరాపై సుదీర్ఘ సమీక్ష నిర్వహించారు. మండలాల వారీగా నీటి లభ్యత, పైపులైన్ల మరమ్మతులు, ఇతర క్షేత్రస్థాయి సమస్యలపై ఆరా తీశారు.

Drinking Water Supply | యుద్ధప్రాతిపదికన మరమ్మతులు

ఏ ఒక్క ఆవాస ప్రాంతంలోనూ నీటిఎద్దడి రాకూడదని కలెక్టర్ స్పష్టం చేశారు. వేసవిలో నీటి సరఫరా వ్యవస్థను నిరంతరం పర్యవేక్షించాలని.. చేతిపంపులు, బోరుబావులకు అవసరమైన చోట వెంటనే మరమ్మతులు చేయించాలని.. పైపులైన్ల లీకేజీలను అరికట్టడంతో పాటు, ప్రతి ఇంటికీ నల్లా ద్వారా శుద్ధిచేసిన జలాలు అందేలా చూడాలని అధికారులకు సూచించారు. గ్రామాల్లోని వాటర్ ట్యాంకులను క్రమం తప్పకుండా శుభ్రం చేయించాలని ఆదేశించారు.

Drinking Water Supply | పాఠశాలలు, వసతి గృహాలపై ప్రత్యేక దృష్టి

జూన్‌లో విద్యా సంవత్సరం ప్రారంభం కానున్న నేపథ్యంలో.. పాఠశాలలు, సంక్షేమ వసతి గృహాలు, అంగన్‌వాడీ కేంద్రాలకు (Anganwadi Centers) నీటి సరఫరాలో ఎలాంటి అంతరాయం కలగకుండా చూడాలన్నారు. ముఖ్యంగా గురుకులాలు, రెసిడెన్షియల్ స్కూళ్లకు సమృద్ధిగా నీరుఅందేలా ముందస్తు చర్యలు తీసుకోవాలని ఆదేశించారు. ఈ ప్రక్రియలో స్థానిక ప్రజాప్రతినిధులను సమన్వయం చేసుకోవాలని కోరారు.

Drinking Water Supply | ఆధునిక వసతులతో ‘తెలంగాణ పబ్లిక్ స్కూల్’

ప్రభుత్వం ప్రతిష్టాత్మకంగా చేపట్టనున్న ‘తెలంగాణ పబ్లిక్ స్కూల్’ (Telangana Public School) నిర్మాణానికి సంబంధించి సమగ్ర ప్రతిపాదనలు సిద్ధం చేయాలని కలెక్టర్ అధికారులను ఆదేశించారు. భీమ్​ గల్ మండలం గోన్‌గొప్పుల ప్రభుత్వ పాఠశాల ఆవరణను ఆమె క్షేత్రస్థాయిలో పరిశీలించారు. అదనపు తరగతి గదులు, ప్రయోగశాలలు, డిజిటల్ లైబ్రరీ, కంప్యూటర్ గదులు, ఆర్​వో ప్లాంట్ వంటి అన్ని ఆధునిక వసతులతో కూడిన ప్రణాళికలను రూపొందించాలన్నారు. కార్యక్రమంలో ఆర్మూర్ సబ్ కలెక్టర్ అభిగ్యాన్ మాల్వియా, (Armoor Sub-Collector Abhigyan Malviya) ఆర్​డబ్ల్యూఎస్​ ఎస్ఈ రాజేందర్, డీపీవో శ్రీనివాస్ రావు, డీఈవో అశోక్, ఇతర నియోజకవర్గ అధికారులు పాల్గొన్నారు.

ఇది కూడా చదవండి..: Farmers MSP Procurement | రైతులు దళారులను నమ్మి మోసపోవద్దు: మార్కెట్‌ కమిటీ వైస్ ఛైర్మన్‌ గడ్డం నర్సారెడ్డి