అక్షరటుడే, వెబ్డెస్క్: LIC New Apps | ప్రభుత్వ రంగ జీవిత బీమా దిగ్గజ సంస్థ లైఫ్ ఇన్సూరెన్స్ కార్పొరేషన్ ఆఫ్ ఇండియా (Life Insurance Corporation of India) రెండు యాప్లను తీసుకువచ్చింది. వినియోగదారుల కోసం ‘మైఎల్ఐసీ’; మార్కెటింగ్ సిబ్బంది కోసం ‘సూపర్ సేల్స్ సాథీ’ (‘Super Sales Saathi’)యాప్ లను ఆవిష్కరించింది. ఇవి పాలసీ నిర్వహణ, ప్రీమియం చెల్లింపు, కొత్త పాలసీల కొనుగోలు సహా పలు అంశాల్లో ఏజెంట్లు, పాలసీదారులకు ఏఐ ఆధారిత సేవలను అందించనున్నాయి.
కార్యాలయాలపై ఆధారపడడాన్ని తగ్గించి, దేశవ్యాప్తంగా ఆపరేషనల్ సామర్థ్యాన్ని విస్తరించేందుకు ఎల్ఐసీ చేపట్టిన ‘ డ్రైవ్’ ప్రాజెక్టులో ఇది ప్రధాన వ్యూహాత్మక మార్పుగా భావిస్తున్నారు. అంటే ఇకపై ఎల్ఐసీ బ్రాంచ్ ఆఫీసులకు వెళ్లాల్సిన పని లేకుండానే, ఫోన్ ద్వారానే పలు రకాల సేవలను పొందడానికి వీలుంటుంది. వినియోగదారులకు మరింత సౌలభ్యాన్ని కల్పించడంతోపాటు ఏజెంట్ల సామర్థ్యాన్ని మెరుగుపరిచేందుకు ఈ యాప్స్ దోహదపడనున్నాయి.
LIC New Apps | మైఎల్ఐసీ యాప్ ..
పాలసీదారులు సులభంగా తమ బీమా పాలసీలను నిర్వహించుకోవడానికి మైఎల్ఐసీ యాప్ (MyLIC App) ఉపయోగపడుతుంది. ఇంతకుముందుకంటే వేగంగా ఆన్లైన్లో ప్రీమియం చెల్లించడానికి అవకాశం ఉంటుంది. యాప్ ద్వారానే పాలసీపై లోన్ తీసుకోవడానికి వీలుంటుంది. పెండింగ్లో ఉన్న లేదా ల్యాప్స్ అయిన పాలసీలను సైతం దీని ద్వారా పునరుద్ధరించుకోవచ్చు. ఇ- కేవైసీ చేసుకోవచ్చు. కొత్త పాలసీల గురించి కూడా తెలుసుకోవడానికి ఈ యాప్ వీలు కల్పిస్తుంది.
LIC New Apps | సూపర్ సేల్స్ సాథీ యాప్..
ఏజెంట్ల సౌకర్యార్థం ఎల్ఐసీ తెచ్చిన యాప్ ఈ సూపర్ సేల్స్ సాథీ. ఇక్కడ అత్యాధునిక డిజిటల్ సేల్స్ టూల్స్ అందుబాటులో ఉంటాయి. దీనిద్వారా పాలసీల స్టేటస్ను ఎప్పటికప్పుడు చూసుకోవచ్చు. పాలసీదారులకు సంబంధించిన ప్రీమియం చెల్లింపు వివరాలును తెలుసుకోవచ్చు. ఏఐ ఆధారిత సూచనల ద్వారా పాలసీదారులకు మెరుగైన సేవలు, సూచనలు అందించడానికి అవకాశం ఉంటుంది. లక్ష్యాలు, సాధించిన విజయాలు చూసుకునేందుకు డాష్బోర్డు అందుబాటులో ఉంటుంది.
ఇది కూడా చదవండి..: Gold Silver Prices | పశ్చిమాసియా ఉద్రిక్తతలు తగ్గే సూచనలు.. దేశంలో బంగారం, వెండి ధరలు పెరుగుదల
