అక్షరటుడే, వెబ్డెస్క్: Hormuz Strait Tensions | పశ్చిమాసియాలో ఉద్రిక్త పరిస్థితులు మరింత తీవ్రరూపం దాల్చుతున్నాయి. కీలక వాణిజ్య మార్గమైన హర్మూజ్ జలసంధిని అమెరికా నౌకాదళం (United States Navy) దిగ్బంధనం చేయడంతో ప్రపంచవ్యాప్తంగా ఆందోళనలు వ్యక్తమవుతున్నాయి.
భారీ యుద్ధ నౌకలను మోహరించి ఇరాన్ (Iran) పోర్టులకు వెళ్లే నౌకలను అడ్డుకుంటోంది.ఈ పరిణామాల మధ్య భారత్కు ఇరాన్ కీలక భరోసా ఇచ్చింది. హర్మూజ్ జలసంధి మీదుగా వెళ్లే భారత నౌకలకు ఎలాంటి ఆటంకం ఉండదని, ఈ మార్గం భారత్కు ఎప్పటికీ తెరిచి ఉంటుందని భారత్లోని ఇరాన్ రాయబారి మహమ్మద్ ఫతాలీ (Iran Ambassador Mohammad Fathali) వెల్లడించారు. భారత్ తమకు అత్యంత సన్నిహిత దేశమని పేర్కొంటూ, నౌకల రాకపోకలపై ఇరుదేశాల మధ్య ప్రత్యక్ష చర్చలు కొనసాగుతున్నట్లు తెలిపారు.
Hormuz Strait Tensions | అమెరికాపై తీవ్ర విమర్శలు..
ఇదిలా ఉండగా, ఇటీవల ఇస్లామాబాద్లో (Islamabad) జరిగిన అమెరికా-ఇరాన్ చర్చలు విఫలమయ్యాయి. ఈ నేపథ్యంలో ఫతాలీ అమెరికా వైఖరిని తీవ్రంగా తప్పుబట్టారు. చర్చల పేరుతో వచ్చిన అమెరికా అసలు ఉద్దేశ్యం ఇరాన్ను లొంగదీసుకోవడమేనని విమర్శించారు. ఇరాన్ హక్కులను గుర్తించి, చట్టవిరుద్ధమైన డిమాండ్లను పక్కన పెడితేనే భవిష్యత్తులో చర్చలు జరగగలవని స్పష్టం చేశారు. అలాగే 2018లో అమెరికా అణు ఒప్పందం నుంచి వైదొలగిన విషయాన్ని ప్రస్తావిస్తూ, గత అనుభవాల వల్ల విశ్వాస లోపం ఏర్పడిందని చెప్పారు. ఈ నేపథ్యంలో ప్రస్తుతం జరుగుతున్న చర్చలు కూడా సరైన దిశలో లేవని అభిప్రాయపడ్డారు.
Hormuz Strait Tensions | చమురు ధరలు భారీగా పెరిగే అవకాశం
మరోవైపు హర్మూజ్ జలసంధి (Strait of Hormuz)లో కొనసాగుతున్న దిగ్బంధనం ప్రపంచ ఆర్థిక వ్యవస్థపై తీవ్ర ప్రభావం చూపుతుందని ఇరాన్ హెచ్చరించింది. ముఖ్యంగా చమురు సరఫరాలు దెబ్బతినే ప్రమాదం ఉందని, దీని వల్ల అంతర్జాతీయంగా చమురు ధరలు భారీగా పెరిగే అవకాశం ఉందని పేర్కొంది. ఇరాన్ చేపట్టిన దాడులు కేవలం అమెరికా సైనిక స్థావరాలపై మాత్రమేనని, పొరుగు దేశాలను లక్ష్యంగా చేసుకోలేదని ఫతాలీ స్పష్టం చేశారు. ప్రాంతీయ స్థిరత్వాన్ని దెబ్బతీయాలనే ఉద్దేశ్యం తమకు లేదని తెలిపారు. ఇక అమెరికా-ఇరాన్ చర్చలు విఫలం కావడంలో ఇజ్రాయెల్ పాత్ర ఉందని ఇరాన్ ఆరోపిస్తోంది. చర్చలు జరుగుతున్న సమయంలోనే ఇజ్రాయెల్ ప్రధాని బెంజమిన్ నెతన్యాహు (Israel PM Benjamin Netanyahu), అమెరికా ఉపాధ్యక్షుడు జేడీ వాన్స్తో మాట్లాడినట్లు ఇరాన్ విదేశాంగ మంత్రి అబ్బాస్ అరాగ్చీ తెలిపారు. ఇజ్రాయెల్ ప్రయోజనాల కోసమే అమెరికా ఈ చర్చలను పక్కదారి పట్టించిందని ఆరోపించారు.
ఇది కూడా చదవండి..: Trump Naval Warning | ఆ నౌకలను వాటిని ధ్వంసం చేస్తాం..ట్రంప్ వివాదాస్పద హెచ్చరిక!
